Gazetari Urim Bajrami ka postuar një faksimile të Këshillit të Ministrave në profilin personal në facebook, ku flitet për mendimin e këtij institucioni, pasi ka vlerësuar inciativën e paraqitur nga një grup deputetësh për propozimin e projektligjit: “Për menaxhimin e integruar të mbetjeve”.
Në mendimin e Këshillit të Ministrave mbi projektligjin, shkruhet se financiarisht ekziston një rrezik që duhet marrë parasysh, rreziku i tregut.
“Të gjitha avantazhet e përmendura në relacion lidhur me rrjetin e eksporteve dhe të vendeve të punës rrezikohen nëse ricikluesit nuk kanë kontrata solide me kompanitë që blejnë produktet e tyre”, thuhet në letër.
Ndërkaq, theksohet se ky nuk do të ishte vetëm një problem financiar për shoqërinë e riciklimit, por edhe për vendin, pasi do t’i ngeleshin miliona kg mbetje të importuara shtesë.
Referuar faksimiles së Këshillit të Ministrave, nënvizohet se 83 për qind e mbetjeve është ende në treg i pa prekur nga kompanitë e riciklimit.
Një nga anëtarët e grupit ideator të këtij projektligji, deputeti socialist, si dhe kreu i Komisionit të Veprimtarisë Prodhuese Eduard Shalsi ka deklaruar se projektligji i depozituar në parlament për importin e mbetjeve iu vjen në ndihmë bizneseve të riciklimit, të cilat janë në prag falimentimi, pasi nuk mjaftohen me lëndët vendase.
