Një udhëtim i pazakontë që ka nisur më 9 nëntor në Francë dhe që pritet të finalizohet në Jeruzalem më muajin Maj. I gjithi në këmbë, ku një pjesë e itinerarit ka përfshirë edhe Shqipërinë, si pjesë e tokës së shenjtë, ku ata kanë vendosur të shkelin. Është kjo historia e dy të rinjve francez të cilët kanë vendosur të bëjnë në këmbë rrugën nga shtëpia e tyre deri në tokën e shenjtë të Jeruzalemit.
Vetëm tri ditë më parë ata kanë shkelur tokën shqiptare nga pika e Hanit të Hotit dhe nga Shkodra janë drejtuar për në Burrel për të dalë më pas në Tiranë dhe për të marrë drejtimin për në Jug të Shqipërisë, ku do të kalojnë në Greqi, Turqi dhe më pas drejt Jeruzalemit.
Rrugëtimi i tyre i shenjtë përveç ushqimit të lehtë, përfshin edhe fjetjen në kisha dhe manastire. Ashtu siç ka ndodhur në qytetin e Burrelit, ku ata kanë fjetur në Kishën Ungjillore të drejtuar nga pastor Rustem Beqiri, ku kanë pranuar të hanë vetëm ushqimin që kishin me vete.
Sipas informacioneve qe Opinion.al mori nga pastori i kësaj kishe, djemtë ishin pajisur me të gjitha mjetet e nevojshme që u nevojiteshin për një udhëtim të gjatë. Duke filluar nga tenxhere, tigan etj. Ndërsa për tu larë përdornin një peshqir të lagur. Një rast unikal po ta mendosh, kjo sipërmarrje e këtyre djemve./ Opinion.al Dritan Laci
