Dy ditë pas ndeshjes me Maqedoninë që rezultoi të ishte një malore e vështirë për Kombëtaren e Shqipërisë, Ansi Agolli, tashmë në statusin e Kapitenit zyrtar të Kombëtares, ka shpjeguar për Opinion.al atë që ndodhi në këtë ndeshje. Një pjesë e parë e mirë, por një pjesë e dytë me gabime në organizimin e lojës, Agolli kërkon të mos e dramatizojë situatën, por ai rrebesh shiu mund të ketë qenë edhe fatsjellës për ekipin që po haste vështirësi të shumta në fushë.
“U futëm në fushë me ritmin e duhur dhe me synimin për të shënuar gjë që ja arritëm me atë supergol të Sadikut. Më pas e administruam lojën mirë dhe me pasime të shpejta deri në momentin e golit të pësuar gjë që na turbulloi idetë pasi deri në ato momente ekipi kundershtar pothuaj nuk na kishte rrezikuar fare. Rrebeshi i shiut nuk na erdhi në ndihmë atë mbrëmje por mbase edhe na kthjelloi disi për ato 15 apo 20 minuta që kishin mbetur. Falë këmbënguljes dhe duke nxjerrë në pah dhe karakterin që ka kjo skuadër ne arritëm atë që donim, të merrnim 3 pikët”.
Largimi nga Kombëtarja i Canës sigurisht që ka sjellë një boshllëk që është e vështirë të mbulohet brenda një kohe të shkurtër. Aq më tepër që prapaviijës do ti mungojë fryma e një lideri që e ka drejtuar për një dekadë me radhë. Vetë Agolli për Opinion.al, në rolin e kapitenit të ri, thotë se; “Në rreshtimin taktik Shqipëria nuk ndryshon pasi me Lorikun kemi luajtur me të njëjtin rreshtim sic luajtëm edhe kundër Maqedonisë. Diferenca është që Loriku kishte vite që luante në atë pozicion dhe mbrojtja ishte mësuar me Lorikun dhe ja dinim lojën njëri-tjetrit, megjithatë Berati dhe Ajeti (që këtë ndeshje ishte i dëmtuar) janë ingranuar mjaft mirë me skuadrën dhe kanë bërë mjaft mirë deri tani. Janë lojtarë profesionistë që e kanë ndihmuar mjaft skuadrën pa harruar edhe shokët e tjerë të repartit mbrojtës!
Por ajo që vazhdon të cilësohet ende si një simptomë e vjetër e pashëruar mbeten gabimet në mbrojtje dhe ajo që mund të quhet nënvlerësim i ekipeve që në letër konsiderohen të lehta, ku gjithmonë Kombëtarja e Shqipërisë vuan në sigurimin e rezultatit. Pyetjes se pse Shqiperia vuan gjithmonë me ekipet që në letër konsiderohen më të lehta, Agolli përgjigjet se që në fillim e kishin konsideruar një ndeshje të vështirë atë me Maqedoninë.
“Unë e kisha thënë dhe para ndeshjes që do ishte një ndeshje e vështirë, por kaq të vështirë nuk e kisha parashikuar. Kombëtarja shqiptare tanimë shihet me një sy tjetër dhe ekipet kundërshtare pavarësisht se në letër nuk janë në nivele të larta mundohen të perfitojnë edhe nga gabimi më i vogël i joni. Tjetra është që nuk është kaq e lehtë të çahet një mbrojtje me 8 lojtarë siç ishte dhe Maqedoina atë mbrëmje!
Sigurisht që 15 minutat e mbetura të lojës do të ishin për Shqipërinë një luftë e vërtetë për të siguruar 3 pikët e para në kualifikueset e Botërorit. Por çfarë ndryshoi në motivimin e lojtarëve dhe cila ishte kërkesa e De Biasit ndaj lojtarëve.
“Unë mendoj që nxorëm edhe njëherë në pah karakterin që ka ky ekip dhe vumë zemrën në ato 15 apo 20 minuta qe kishin ngelur. Motivimi ishte pika kryesore sepse të rimotivohesh për 20 minuta aq me shumë një ditë më pas kërkon profesionalizëm dhe disiplinë që kjo skuadër i ka me shumicë”
Gjithsesi në fund të bisedës me Opinion.al, Ansi Agolli thekson edhe njëherë nevojën që ekipi ka për përmirësim, sidomos pas asaj që ndodhi me Maqedoninë.
“Në rezultat morëm atë që dëshironim por që vend për përmirësim ka dhe duhet të punojmë akoma më shumë për t’u përmirësuar. I bëmë një nisje të mbarë këtyre eleminatoreve por nuk duhet të kënaqemi me kaq. Në fund të fundit bëmë detyrën tonë dhe mund ta bëjmë akoma më mirë vetëm nëse bëjmë ato që trajneri na kërkon me disiplinë, profesionalizëm dhe përulësi. Ndeshje të vështira na presin madje akoma më të vështira se kjo që kaluam. Ne duhet të jemi gati në çfarë do lloj situate duke ja lehtësuar punën trajnerit dhe duke i qëndruar afër shokut”./ Bisedoi Dritan Laci Opinion.al
