Ja si e gjykon kryeministri punën e Gjykatës së lartë. Në harkun kohor të 4 ditëve, Edi Rama vlerëson se Gjykata e lartë është vendi që ka bllokuar gjykimin e dosjes së 21 janarit. Më shumë se kritik, kryeministri bën fajtore pikërisht këtë gjykatë për ngecjen e hetimeve. Por vetëm 2 ditë më pas, Rama ndryshon mendim. Ai shpreh besimin se e njëjta gjykatë do të trajtojë me ndershmëri dhe pa paragjykime deputeten Albana Vokshi, e cila “i ka rënë në qafë” tenderave shumëmilionësh të ministrisë së shëndetsisë. A mund ta gjejë ndokush c’mendim ka për punën e gjykatës së lartë shefi i ekzekutivit?
“Çdonjëri nga anëtarët e Gjykatës së Lartë, që qysh prej vitit 2013 mban të varrosur dosjen e 21 janarit pa guxuar ta nxjerrë në dritën e gjykimit, është sot drejtpërdrejtë i akuzuar si fajtor për vuajtjen tuaj 5-vjeçare në kërkim të drejtësisë. Fakti rrënqethës se dosja e 21 janarit është e vetmja dosje e mbetur pa gjykuar nga viti 2013 në Gjykatën e Lartë të Shqipërisë, del dhe tepron për të kuptuar se kush e ka kapur për fyti drejtësinë shqiptare, përmes gjykatësish që një Zot e di sesa të rënduar e kanë ndërgjegjen e tyre.”
Edi Rama
21 Janar 2016
“Zyra e Kryeministrit informon publikun se ka ndërmarrë hartimin e kallëzimit të deputetes Albana Vokshi për veprën e shpifjes. Ka ardhur koha që Gjykata e Lartë të kalojë në sitën e gjykimit të saj të pavarur e të paanshëm edhe akuzat e deputetes në fjalë. Njësoj si në rastet e shpifësve Paloka dhe Ristani, Kryeministri Rama shpreh publikisht gatishmërinë e tij për të dhënë dorëheqjen, jo vetëm nga detyra, por edhe nga aktiviteti i tij politik, nëse deputetja Vokshi do të provojë në gjykate se shpifjet e saj ndaj Kryeministrit nuk janë të tilla.”
Edi Rama
23 Janar 2016
