Ka folur për mediat, Hyrije Hyka, bashkëshortja e Fasli Hykës i cili u arrestua nga Policia e Shkodrës, pasi gjatë natës qëlloi me armë zjarri në drejtim të tre të rinjve të cilët po bënin zhurmë në rrugë.
I bezdisur nga zhurma e tyre pas mesnate, i moshuari ka telefonuar Policinë dhe u ka kërkuar ndihmë, por pas pak minutash ka vendosur që të marrë çiften dhe nga ballkoni i katiti të 5-të ka qëlluar në drejtim të tyre. Fatmirësisht nga të shtënat nuk ka persona të lënduar, ndërsa u dëmtua një makinë e parkuar në rrugë.
83-vjeçarja tregon se dikush që ishte në rrugë e ka sharë burrin e saj, i cili ka marrë çiften më pas duke qëlluar në drejtim të tyre.
Bashkëshortja e 83-vjeçarit që u arrestua nga FNSH pasi u neutralizua brenda banesës në operacionin që zgjati 3 orë e gjysmë, thotë se burri i saj deshi të dorëzohej në polici në orët e mëngjesit ndaj edhe nuk pranoi më përpara derisa u arrestua pas ndërhyrjes nga efektivët. Fasli Hyka sipas bashkëshortes së tij përveç punëve normale gjatë regjimit të komunizmit ka punuar edhe në sigurimin e shtetit si agjent vullnetar.
83-vjeçarja është e vetme në shtëpi tashmë pas arrestimit të burrit të saj ndërsa lëviz me shumë vështirësi për shkak të disa sëmundjeve që ka. Çifti i të moshuarve jetojnë prej vitesh të vetëm në shtëpi ndërsa autori i dyshuar Fasli Hyka ka një djalë nga martesa e tij e parë.
