Tre nga 7 kandidatë vazhdojnë garën për Kryeprokuror të Përkohshëm. Raporti i Komisionit të Ligjeve është firmosur nga kryetari Ulsi Manja dhe relatori Bledi Çuçi.
Tre garuesit janë: Arta Marku, Ferdinand Elezi dhe Ermira Tafani. Më herët në media u fol se për Arta Markun po lobon Ulsi Manja ndërsa për Ferdinand Elezin lobon Vangjush Dako. Ndërsa Ermira Tafani thuhet se ka mbështetjen e Taulant Ballës. Këto tre emra i kalojnë Parlamentit për votim të hënën, më 18 Dhjetor. Mazhoranca do të jetë e vetme në zgjedhjen e kreut të akuzës, pasi opozita e ka bojkotuar këtë proçes.
Të skualifikuarit nga gara janë: Arqile Koca, Artur Selmani, Besnik Muci dhe Granit Shahu.
Në raportin e detajuar të Komisionit të Ligjeve shkruhet:
Arta Marku; Përmbush kushtet dhe kriteret ligjore të përcaktuara në Kushtetutë. Eshtë emëruar si Prokurore pas Magjistraturës. Plotëson kushtet dhe kriteret ligjore që përcaktohen në nenin 23 të Ligjit të Prokurorisë për figurën morale dhe profesionale të kandidatit. Sa i takon vlerësimit profesional rezulton se ka marrë vlerësimin ‘shumë mirë’. Ka ushtruar funksionin si zv.drejtues të Prokurorisë së Shkodrës.
Ferdinand Elezi; Plotëson kushtet dhe kriteret ligjore që parashikohen në Kushtetutë si dhe ato në Ligjin e Prokurorisë lidhur me integritetin moral dhe profesional. Plotëson edhe kërkesat e ligjit sa i përket të shkuarës në komunizëm, nuk ka qenë anëtar, bashkëpunëtor, apo i favorizuar si Sigurimit të Shtetit.
Ermira Tafani; Përmbush kushtet dhe kriteret ligjore lidhur me integritetin moral dhe profesional. I plotëson edhe kërkesat ligjore që vijnë nga ligji për garantimin e integritetit të personave që zgjidhen në funksione publike. Nuk ka qenë anëtar, bashkëpunëtor, apo i favorizuar nga Sigurimi i Shtetit.
***
Arqile Koca; Plotëson kushtin 15 vjet jurist. Plotëson edhe kushtet e parashikuara në ligjin e Prokurorisë lidhur me integritetin moral dhe professional. Nuk ka gradë shkencore në Drejtësi.
Artur Selmani; Përmbush kushtin formal të jo më pak se 15 vjet përvojë pune si prokuror. Plotëson pjesërisht kushtet që lidhen me kriterin moral dhe profesional të kandidatit. Duhet të shihni shkresën e ILDKP-së. Ky kandidat plotëson kërkesat e ligjit sa i përket të shkuarës në komunizëm. Ka një masë disiplinore si dhe nuk ka gradën shkencore në drejtësi.
Besnik Muci; Plotëson kushtet dhe kriteret ligjore lidhur me integritetin moral dhe professional. Nuk përmbush kushtin për vjetërsinë në punë, 15 vjet përvojë pune. Sic e ka thënë edhe në CV e tij rezulton se ka 14 vjet si prokuror.
Granit Shahu; Nuk përmbush kushtin e vjetërsisë, pra nuk ka 15 vjet përvojë pune si prokuror. Nuk plotëson kushtet dhe kriteret ligjore sa i përket integritetit moral dhe profesional.
