Motrat binjake nga Estonia: Leila, Liina dhe Lily Luik, kanë shkruar historinë e sportit botëror, duke u bërë trinjaket e para që kualifikohen në një Olimpiadë. Liina dhe Lily ishin kualifikuar që më parë, ndërsa dje ka prerë një biletë për në “Rio 2016” edhe Leila. Dhe, të trija do të garojnë në maratonë. Një lajm që natyrisht ka bërë xhiron e botës dhe kur të zhvillohet gara në gusht, ato do të bëjnë sërish lajm kur të garojnë në rrugët e Rios.
Ato realizuan një ëndërr që e ndiqnin që nga viti 2010, kur dhe nisën të garojnë seriozisht në garën e maratonës.
Rregullorja lejon që në maratonë të marrin pjesë maksimumi 3 atletë nga një shtet dhe aktualisht ato janë të trija të kualifikuara, duke qenë se kanë kapur normën e lejuar nga IAAF-i.
Por para se të nisnin të merreshin me atletikë, ato kanë provuar të kenë sukses në danc dhe not.
Tri motra binjake bukuroshe, që natyrisht do të bëjnë për vete edhe fansat e Olimpiadës.
Sy bojëqielli, flokë të verdha, vajza tipike nordike, të bukura dhe plot rrezatim, ato shpresojnë të realizojnë në “Rio 2016” ëndrrën për medalje. Ato garojnë në Estoni me skuadrën e Academic Sports Club Tartu dhe janë kampione në garat e gjata në vendlindjen e tyre. Natyrisht që kohët e tyre nuk krahasohen me ato të atleteve kampione, si në 10 mijë metra ashtu dhe në maratonë, por falë famës që kanë fituar kanë ditur të bëjnë për vete mediat e fansat. Dhe tani, në “Rio 2016”, të gjithë do t’i vëshgojnë gjatë garës.
