Projekti i stadiumit “Arena Kombëtare” i propozuar ditën e djeshme në praninë edhe të kryeministrit Rama ka ngjallur debat të madh.
Menjëherë, pas bërjes publike të realizmit të këtij projekti nga studio italiane “Archea”, zërat kritik u shtuan në lidhje me atë se çfarë fshihet pas këtij projekti.
Një prej tyre është edhe gazetari, Andi Bushati, i cili nëpërmjet një shkrimi në Lapsi.al bën me dije se ndërtimi i këtij “stadiumi”, ka veçse një qëllim; ti merret fryma deri në fund Tiranës në emër të interesave financiare.
Bushati shkruan se sa më shumë ditë kalojnë, aq më shumë bindemi se nuk kemi parë gjë akoma.
“Po jetojmë ditë të veçanta kur mënyra më e mirë për të kapërcyer një skandal, është të krijosh një tjetër më të madh. Kështu ka ndodhur edhe këtë radhë. Nuk është mbyllur ende debati për betonizimin e parkut të liqenit. Nuk është mbyllur ai për lejet e gjashtë kullave të ndërtimit që Rama dha në Tiranë duke pretenduar se i kish trashëgim nga Basha. Nuk është mbyllur as ai për përçudnimin e sheshit “Nënë Tereza” në emër të ngritjes së një hyrjeje për parkun“, shkruan Bushati.
Ai thekson se pavarësisht gjithë këtyre gjërave, Edi Rama, dje, me mburrje dhe krenari ka prezantuar një shpikje tipike shqiptare: Stadiumin e ri kombëtar me një kullë gjigande mbi të.
“Sapo e pashë këtë prezantim mbeta i çuditur nga diçka: të gjithë mediat flisnin për Arenën e re kombëtare, për kryeministrin që kish evokuar stadiumin e Juventusit, -shkruan Bushati- për shifrën 50 milionshe që do hidhej në këtë investim sipas formulës më në modë, të partneritetit publik privat, por askush, askush nuk e përmendte atë phallus gjigand që ngrihej mbi stadium. Ai dukej i heshtur vetëm në foto dhe makete”.
Bushati nënvizoi se qëllimi i vërtetë nuk është se ka qenë që aty të ngrihet një stadium, nuk ka qenë as aty, që në emër të një impianti sportiv, të gjenden forma që ta bëjnë privatin që do të financojë, të interesuar.
Sipas tij, i gjithë ky projekt të jep idenë se po përdoret stadiumi kombëtar për të ndërtuar një kullë.
“Për të ngritur një qendër biznesi, me mjedise që shiten nga 2 mijë 3 mijë euro metri katrorë”, shkruan ai.
