Kryetarja e LSI, Monika Kryemadhi, ka reaguar pas deklaratës së Presidentit Ilir Meta, i cili u shpreh se opozita u largua nga Kuvendi duke bërë kryeministrin Rama më të fortë, ndërsa vet është shndërruar në një OJQ.
Gjatë një interviste për “Zërin e Amerikës”, Kryemadhi është shprehur se opozita është detyruar të shkojë drejt vendimit ekstrem për t’u larguar nga Kuvendi. Ndërkohë, kryetarja e LSI, shtoi se në politikën shqiptare ekzistojnë edhe faktorë antishqiptarë.
“Opozita është dëmtuar, sepse u detyrua të shkojë drejt ekstremiteteve për shkak të kapjes së shtetit nga bandat e Rilindjes. Edi Rama ka kapur shtetin, duke e dërguar vendin në një gjendje të rëndë, ku gjendemi përballë stabilitetit, ndërkohë që kemi grupe të mëdha zhvillore ekonomike, që shpesh herë janë antishqiptare dhe anti-stabilitetit të rajonit. Ne po punojmë me partnerët tanë për Reformën Zgjedhore, në mënyrë të pavarur. Diskutimi i Reformës zgjedhore duhet të jetë i të gjitha partive, i gjithë shoqërisë civile, asaj që përballet me vështirësi të mëdha. Kriza politike në Shqipëri zgjidhet me anë të zgjedhjeve të lira e të ndershme. Sot problemi më i madh janë që të ketë zgjedhje të lira e të ndershme. Ngritja e Kushtetueses, ajo do të ç’bllokonte ngërçin politik”, deklaroi Kryemadhi.
Çfarë tha Meta në Opinion
Ilir Meta: Presidenti është i popullit.
Blendi Fevziu: I zgjedhur nga Kuvendi?
Ilir Meta: Po, por është i popullit, nuk është as i PS as i LSI, as i PD dhe askujt.
Blendi Fevziu: Ata pretendojnë se je i LSI dhe i PD.
Ilir Meta: PD dhe LSI janë shumë më pranë qeverisë se presidenti, po ta sqaroj unë.
Blendi Fevziu: Si pranë qeverisë?
Ilir Meta: Me veprimet që kanë bërë, jo ik nga parlamenti jo ik andej ik këtej, ato i kanë shërbyer kapjes së shtetit. I kanë lënë njerëzit pa mbrojtje, i kanë nxjerrë njerëzit kot më kot në rrugë, e kanë kthyer opozitën në OJQ. E kanë lënë dhe presidentin, jo Ilir Metën, të ekspozuar nga një bandë atje, ku 180 e ca njerëz kanë dhënë dorëheqjen dhe kanë hyrë ca fundi i fundit të listave dhe i bëjnë gjyqin presidentit. Këtë nuk e ka bërë vetëm Rama, e kanë bërë dhe këta që ranë pre provokimit të tij.
Blendi Fevziu: Ju s’mund të jeni trim në luftë.
Ilir Meta: Une s’jam vetëm, jam i popullit shqiptar dhe kur të vij momenti do i flas hapur popullit shqiptar, siç flas unë. Një deklaratë bëra në Pogradec, vetëm fare dhe nuk mblodha 10 mijë veta, vetëm fare dhe e dhanë 1000 media botërore, kështu që të kenë kujdes.
Blendi Fevziu: Ky është kërcënim ndaj mazhorancës?
Ilir Meta: Jo, jo kjo është një deklaratë besnikërie ndaj popullit shqiptar./ Opinion.al
