Aktualitet

“E ka brejtur ndërgjegjja”, zbardhet vendimi që liroi Endrit Doklen


               Publikuar në : 16:43 - 26/01/20 |
Al Do

Ish-anëtari i bandës së Durrësit, Endrit Dokle është edukuar në burg pasi e ka brejtur ndërgjegjja dhe është gati të riintegrohet në shoqëri sipas vendimit të gjyqtares Enekleda Hoxha që pranoi kërkesën e tij për lirim nga qelia.

Arsyetimi që ka shoqëruar vendimin e të Gjykatës së Krujës është bazuar në raportin vlerësues të Drejtorisë së Burgut Fushë-Krujë, për sjelljen e Ednrit Dokles në qeli, si edhe në raportin e Zyrës së Shërbimit të Provës Krujë.

I dënuari, përsa i përket qëndrimit ndaj veprës penale dhe viktimës, është i penduar. I dënuari nuk ka konsumuar më parë vepër tjetër penale. Gjendja fizike dhe psikologjike e të dënuarit është jo e mirë. Sjellja e tij në institucionin tonë e bazuar nga kontaktet dhe dosja e tij personale është shumë e mirë”, shkruhet në raportin e Drejtorisë së Burgut Fushë-Krujë.

Zyra e Shërbimit të Provës ka rekomanduar gjithashtu lirimin e të dënuarit me burgim të përjetshëm në raportin e saj

Koha e kaluar i mbyllur dhe larg familjes, e ka bërë të reflektojë shumë se pasojat e ardhura nga veprat penale në jetën e tij janë shumë të rënda dhe kurrsesi nuk e percepton ripërjetimin e një situate të tillë. Ai reflekton brejtje të ndërgjegjes për të gjitha pasojat e sjella në familje dhe jashtë saj. I dënuari ka shfaqur pendim të thellë për veprën penale, për të cilën është dënuar”, thuhet në raportin e Zyrës Vendore të Shërbimit të Provës Krujë.

Këto raporte e kanë bindur gjyqtaren Enkeleda Hoxha se Endrit Dokle ishte edukuar në burg por për lirimin e tij ajo ka marrë gjithashtu për bazë problemet depresive të të dënuarit, babain e tij të sëmurë, kontratën e punësimit të tij në një pike ndërtimi e cila rezulton nën sekuestro, si edhe disa vendime të Gjykatës Europiane të të Drejtave të Njeriut.

Ish-numri dy i bandës së Durrësit vuante dëminin me burgim të përjetshëm edhe pas vendimit të Gjykatës Kushtetuese. Mbi të rëndojnë akuzat për 2 vrasje, 4 të mbetura në tentativë, krijim i organizatës kriminale, rrëmbimi ose mbajtja peng e personit, moskallëzim krimi dhe dy akuza për prodhim dhe mbajtje pa leje të armëve dhe municioneve luftarake./Opinion.al

Pas