“Doni luftë, luftë do të ketë. Shpojuani gomat e makinës, thyejuani xhamat…… ora t’i marrim zvarrë në këtë shesh…”. Kjo ishte porosia e Lulzim Bashës javën e kaluar, për protestuesit e Partisë Demokratike.
Ndoshta i frymëzuar nga kjo deklaratë, një incident u shmang mbrëmë në çadrën para kryeministrisë kur një protestues tentoi t’i verë “flakën qeverisë”. Mënyra origjinale që gjeti dje PD-ja për të tërhequr vëmendjen ishte krijimi i disa ‘ministrave prej kartoni’ në madhësinë e lartësinë e një njeriu real.
Siç shihet në videon dhe fotot e GSH.al, një protestues ka tentuar “t’i vendosë flakën” ministrit të Shëndetësisë, Ilir Beqaj brenda në çadër. Gazetarët e GSH.al raportuan se personi në foto derdhi një gjysëm bidoni me raki mbi ministrin dhe tentoi t’i verë flakën.
Problemi është se zjarri brenda në një çadër nuk është i këshillueshëm dhe mjaft protestues të tjerë nxituan ta ndalojnë personin ta bëjë këtë veprim. Fatmirësisht, rakia nuk ndezi dhe nuk u arrit që qeveria “të digjet”. Të paktën, deri në zgjedhje.
