TIRANE- Gjykata e Lartë ka rrëzuar në dhomë këshillimi rekursin e Prokurorisë së Përgjithshme për rastin e “21 Janarit”. Prokuroria e Përgjithshme kishte kërkuar dënimin me 23 vjet burgim për Ndrea Prendin dhe 25 vjet për Agim Llupon.
Lajmi është mësuar nga mediat, përmes burimeve, pasi vendimi ende nuk është zbardhur në faqen zyrtare të Gjykatës së Lartë.
Kështu mësohet se Kolegji Penal i Gjykatës së Lartë është mbledhur të premten dhe vendimi duket se është marrë të hënën paradite, duke rrëzuar rekursin e Prokurorisë së Përgjithshme.
Kolegji Penal, i përbërë nga Edmond Islamaj, Artan Zeneli, Aleksandër Muskaj, Guxim Zenelaj dhe Shkëlzen Selimi lë kështu në fuqi vendimin e gjykatës së Apelit Tiranë.
Vendimi i Apelit u dha në vitin 2013 dhe dha dënimin me një vit burgim për ish-komandantin e Gardës së Republikës, Ndrea Prendi dhe dënimin me 3 vjet burgim për ish-gardistin Agim Llupo.
Ndërkohë, shoferi i ish-komandantit, Margarit Kume u shpall i pafajshëm. Për 21 Janarin prokuroria humbi nga njëra shkallë e gjyqësorit në tjetrën, ndërsa humbja e sotme shënon mbylljen përfundimtare në sistemin gjyqësor të kësaj çështjeje të rëndë kriminale dhe me prapavijë politike.
