Policia e Tiranës ka kallëzuar në Prokurori kryetarin e Partisë Demokratike Lulzim Basha, për thirrje për akte të dhunshme. Kallëzimi vjen pas thirrjes së bërë nga kryetari Basha në Çadrën e Lirisë ku u kërkoi protestuesve të shponin gomat e makinave dhe të thyenin xhamat e makinave
“Kushdo që godet qytetarët dhe protestën, do të vijë ora t’i marrim zvarrë në këtë shesh. Doni luftë? Luftë do ketë. Shponi gomat, thyeni xhamat atyre që ju ndëshkojnë pa të drejtë. Kush luan me popullin t’i bëjë llogaritë mirë, se ndryshe vala popullore do t’i fshijë nga zyrat. Kjo është një lëvizje popullore pa kthim, nuk është një manifestim partiak. Populli nuk mund të durojë më. Durimit të popullit i ka ardhur fundi, edhe durimit tonë. Boll me akte të paligjshme në kurriz të shqiptarëve, në kurriz të biznesit, por vjen momenti kur nuk do të gjeni vrimë miu për t’u futur, kur zemërata popullore të rritet. Kur ju godasin, mos ktheni faqen tjetër, por goditini me grusht. Për çdo padrejtësi goditini me grusht, koha kur populli trajtohet si dele po merr fund”, tha dje Basha.
Tani pritet të shikohet se si do të sillet Prokuroria me kallëzimin e Policisë së Shtetit. Nëse ka kryer apo jo Basha vepër penale me thirrjen e djeshme.
