Deputetja Rudina Hajdari ka komentuar shkarkimin e nënës së saj, Fatmira Hajdari nga Vettingu.
Hajdari tha nga foltorja e Kuvendit se vendimi i KPK është përgjigje për të gjithë ata persona që mendonin se ajo nuk dogji mandatin për të mbrojtur nënën e saj.
Ajo theksoi se beson tek reforma në drejtësi dhe pse ajo shkoi përtej interesave të familjes së saj.
“Ata që mendonin se u futa në Kuvend për të mbojtur time më, që më janë hedhur si ujqër sot e morën përgjigjen, unë besoj te Reforma në drejtësi, sepse shkoj përtej interesave të familjes sime”, tha Hajdari.
Fatmira Hajdari kishte probleme me justifikimin e pasurisë në vlerën e 60 milionë lekëve.
Problematik u konsiderua ndërtimi i një pallati 10-katësh në truallin e familjes pranë banesës së saj në Rrugën e Elbasanit në Tiranë, prej djalit të saj dhe një shoqërie private.
Sipas KPK, ndërtimi ishte pa leje dhe mbi një pjesë toke që nuk ishte pronë e tyre. Në lidhje me kriterin e figurës, ajo vlerësohet e papërshtatshme me argumentin se nuk kishte deklaruar faktin se i ishte refuzuar viza për në Shtetet e Bashkuara të Amerikës.
Hajdari u përlot, duke thënë se ndihet e fyer që ishte vënë në diskutim figura e saj, duke thënë se kur kishte plotësuar formularët vetingut nuk kishte pasur dijeni për revokimin e vizës./ Opinion.al
