Presidenti francez Emmanuel Macron i kërkoi udhëheqësit kinez, Xi Jinping të enjten që të arsyetojë me aleatin e ngushtë Rusinë dhe të ndihmojë në përfundimin e luftës në Ukrainë, ndërsa Xi u përgjigj duke thënë se shpresonte që të dyja palët të mund të zhvillonin negociatat e paqes sa më shpejt të jetë e mundur.
Në bisedimet e ndjekura nga afër në Pekin, të cilat përfshijnë gjithashtu shefen e BE-së Ursula von der Leyen, Macron tha se Perëndimi duhet të angazhojë Pekinin për të ndihmuar në përfundimin e krizës dhe për të parandaluar tensionet ‘spirale’ që mund të ndajnë fuqitë globale në blloqe ndërluftuese.
“Agresioni rus në Ukrainë i ka dhënë një goditje stabilitetit (ndërkombëtar)”, i tha Macron Xi-t, duke qëndruar përkrah presidentit kinez jashtë Sallës së Madhe të Popullit në fillim të takimit të tyre.
“Unë e di se mund të mbështetem tek ju për ta sjellë Rusinë në vete dhe në tryezën e bisedimeve” .
Në komentet pas takimit të tij me Macron, Xi bëri thirrje për bisedime midis dy palëve si dhe gjetjen e një zgjidhjeje politike për luftën në Ukrainë.
Xi tha se të gjitha vendet duhet të respektojnë mospërhapjen e armëve bërthamore, pa përmendur specifikisht Rusinë.
Vizita e liderëve të BE-së në Kinë vjen pas viteve të acarimit të marrëdhënieve me Pekinin për çështje që përfshijnë akuzat për abuzim të të drejtave në Xinjiang, një pakt investimi të ngecur dhe hezitimin e Kinës për të dënuar Rusinë për pushtimin e saj në Ukrainë.
