Ndërsa policia nuk ka dhënë asnjë informacion zyrtar mbi autorët e dyshuar të vrasjes së Elton Çiços, gazetat japin detaje të ndryshme. Sot Shqiptarja.com shkruan se “ka dyshime se është urdhëruar nga Holanda vrasja e 35 vjeçarit nga Tepelena”. Po sipas kësaj gazete, porositësi i vrasjes ka lidhje shoqërore me laçianin Robert Rama që u ekzekutua para disa muajsh në Durrës. Vrasja kjo e mbetur pa autorë.
“Gjatë këtyre ditëve policia ka mbledhur informacione operative duke ja referuar prokurorisë së Tiranës, duke e informuar se viktima Elton Çiço mund të jetë vrarë me urdhër të një personi që ka dyshime se fshihet në Hollandë, por që aktualisht ndodhet në kërkim policor nga drejtësia shqiptare, për një krim tjetër të ndodhur në Tiranë”, raporton Shqiptarja.com.
I dyshuari që policia kriminale ka ngritur dyshime se ka urdhëruar vrasjen e Elton Çiços, ka pasur njohje, lidhje shoqërore dhe biznesi me viktimën Robert Rama, të ekzekutuar në muajin qershor 2015 në qytetin e Durrësit.
