Komisioni i Pavarur i Kualifikimit ka konfirmuar në detyrë Kryetarin e Gjykatës Administrative të Apelit në Korçë, Sokol Ibi.
Nga hetimi i gjyqtarit Ibi, KPK konstatoi disa probleme në kriterin e pasurisë. KPK evidentoi pasaktësi në deklarimin e një shtëpie banimi me sipërfaqe 127 m2 në një truall me sipërfaqe 324 m2 që gjyqtari Ibi e ka blerë nga prindërit në vitin 2002. Dë deklaratat para fillimi të detyrës rezultonte se ishte pasqyruar vetëm shtëpia dhe trualli ndërsa më vonë ishte shënuar edhe pasuria tokë.
KPK konstatoi gjithashtu se për shit-blerjen e banesës nga babai në vitin 2002, figurojnë dy kontrata të së njëjtës datë, të nënshkruara nga e njëjta notere, ku pasqyrohen të njëjtat pasuri, por me vlera të ndryshme. Ndërkohë, për një ngastër toke që e ka blerë po nga prindërit e tij, Komisioni evidentoi se kontrata e shit-blerjes është kryer pa vullnetin e motrës, e cila rezultonte të ishte bashkëpronare.
KPK ngriti gjithashtu dyshime për një automjet tip Benz të blerë nga babai i Ibit në vitin 2008 ndërkohë që ai nuk disponon një leje drejtimi dhe janë ngritur dyshime lidhur me qëllimin e blerjes së këtij mjeti, pasi rezulton se është përdorur nga gjyqtari Ibi. Nga analiza financiare, Komisioni ka konstatuar pamundësi financiare të prindërve në vlerën e rreth 161 mijë lekëve për blerjen automjetit në fjalë.
Lidhur me profesionalizimin, Komisioni konstatoi mosrespektimin e afateve në shqyrtimin e disa çështjeve. Ndërkohë sa i përket pastërtisë së figurës KPK konstatoi se Ibi nuk ka kontakte të papërshtatshme me persona me lidhje me krimin e organizuar.
Lidhur me akuzat e bëra nga KPK, gjyqtari dha përgjigjen e tij duke sqaruar se disa nga burimet e të ardhurave ishin siguruar ndër vite përpara se ai të merrte detyrën duke punuar në bujqësi dhe bursa si student.
Këto sqarime kanë qenë të mjaftueshme për KPK duke qenë se sot ai u konfirmua në detyrë. /Opinion.al
