Dy ditë pasi OSBE/ODHIR publikoi raportin për zgjedhjet e 30 Qershorit, ministri i Jashtëm, Gent Cakaj e ka cilësuar atë si një konfirmim të një procesi demokratik në zgjedhjet vendore.
Në një konferencë për mediat, Cakaj ka analizuar në detaje raportin duke përmendur ato që sipas tij janë gjetjet kryesore. Ministri i Jashtëm theksoi se raporti ishte shumë kritik për opozitën.
“Raporti sqaron se në Shqipëri zgjedhjet janë zhvilluar pa konsideratë të mjaftueshme të interesave të elektoratit. Kjo vjen nga bojkotimi i zgjedhjeve nga opozita. Raporti është i qartë se opozita ka ushtruar presion madhor në elektorat për mospjesëmarrje në zgjedhje. Raporti i OHDIR e cilëson sjelljen e PD dhe LSI, në raport me godinën e Kryeministrisë, si të dhunshme. Një ditë pas zgjedhjeve më me rëndësi sesa emrat e rinj që janë legjitimuar në këtë proces, ka qenë dëshmia se braktisja e parlamentit nuk mund të përkthehet në avancim institucional. Kësaj radhe kemi pasur shumë më shumë sesa bojkoti nga opozita. Jemi ekspozuar nga një dhunë vandaliste para dhe pas procesit zgjedhor. Këtë e thotë edhe raporti. Madje kemi pasur tentativa për bllokim të procesit të integrimit të Shqipërisë në BE. Tashmë me publikimin e raportit, ekziston një opinion se procesi zgjedhor ka qen i rregullt” tha Cakaj
Ai nënvizoi gjithashtu se raporti i OSBE/ODHIR-it konfirmoi qëndrueshmërinë e institucioneve dhe demokratizimin e procesit si dhe nuk la pa përmendur
“Zgjedhjet e 30 qershorit 2019 nuk kanë qenë vetëm zgjedhje demokratike, por në fakt edhe vendosje e një shembulli të pakthyeshëm historik se duke dëshmuar se qëndrueshmëria institucioneve është me e lartë sesa shuma e interesave partiake. Zgjedhjet e tejkaluan sjelljen e dhunshme” shtoi ministri i Jashtëm.
Sipas Cakajt, gjetja e raportit se gjatë fushatës elektorale nuk i është dhënë vëmendje programeve elektorale, është gjithashtu pasojë e bojkotit të opozitës.
“Raporti thekson se klima ka qenë e polarizuar dhe nuk i ka kushtuar vëmendje programeve. Kjo është rrjedhojë e atyre që kanë bojkotuar procesin. Opozita në veçanti ka ushtruar presion madhor në elektoratin në shkallë të lartë, kryesisht në bashkitë e drejtuara prej tyre. Numri i pjesëmarrësve të 30 qershorit është më i lartë se në vitin 2015” tha Cakaj. /Opinion.al
