Pasiguria për jetën në Shqipëri vijon të jetë në përmasa të frikshme.
Rastet e dhunës nga më të ndryshmet dhe viktimat e këtyre rasteve janë të shumta fatkeqësisht në vendin tonë, por kur këto raste nuk përfillen apo neglizhohen nga institucionet që në fakt kanë për qëllim të të ofrojnë mbrojtje, situata bëhet edhe më e rëndë.
Emisioni investigativ “STOP” këtë të mërkurë sjell dy raste dhune të denoncuara nga dy qytetarë.
Natasha Përleka nga qyteti i Lezhës i është drejtuar emisionit “STOP” për të denoncuar rastin e saj, me shpresën se këtu do t’i dëgjohet zëri.
Për mikrofonin e “STOP” ajo rrëfen se ka rënë viktimë e një rasti kur është përpjekur për të ndihmuar një person duke i dhënë 500 mijë lekë borxh.
Por, personi që ka marrë paratë jo vetëm që nuk ia ka shlyer ato, por si shpërblim e ka rrahur në mënyrë barbare, shenja të cilat janë të dukshme ende në fytyrën e Natashës dhe madje e ka përplasur edhe me makinë.
Natasha i është drejtuar policisë së Lezhës, por kjo e fundit e ka dërguar atë në spital dhe e kanë mbyllur me kaq rastin, pa e regjistruar. E shoqëruar nga gazetarja e emisionit, në Policinë e Shtetit i bëjnë të mundur regjistrimin e denoncimit.
Rasti i dytë i transmetuar në emision ka të bëjë me të njëjtin fenomen, atë të dhunës, këtë herë në kryeqytet.
Viktimë e dhunës makabër me sende të forta ka mbetur një i moshuar. Ky i fundit është goditur me tub hekuri nga një person me probleme të shëndetit mendor.
Djali i tij, Ruzhdi Dapi i është drejtuar emisionit “STOP” pasi as në këtë rast sipas tij policia nuk vepron, duke qenë se i akuzuari është vëllai i administratorit të Bërxhitës, Refik Velija.
Djali i të moshuarit bën apel për ndihmë pasi personi në fjalë përbën rrezik jo vetëm për gjithë pjesëtarët e familjes së tij, por edhe për gjithë komunitetin, nëse nuk merren masat e nevojshme.
Çfarë problemi ke pasur?
Natasha Përleka: Kam pasurnjë ngatërresë me dy persona atje, me Saimir Dedgjonin dhe Tonin Dedgjonin.
Për çfarë arsye, pse e ke pasur këtë ngatërresë?
Natasha Përleka: Ju kam pas dhënë disa lekë borxh më përpara, edhe gjithnjë ua kam kërkuar lekët e mia. Shkova tek shtëpia për t’i kërkuar benë babait të tij, djali më kapi telefonin dhe e theu, më gjuajti dy tre herë me shkelma, doli Tonini vetë e më kapi me shkelma e grushte, çfarë s’më ka bërë. Njëherë më ka përplasur me makinë. Atëherë u drejtova tek policia e Lezhës, kjo polici më ka çuar deri tek spitali, më çoi tek doktori mjeko-ligjor. Ai tha mjekoi fytyrën se e kisha të enjtur dhe për mua tani është e gatshme për të shkuar tek shtëpia se nuk ka asgjë. Policia nuk e ka pranuar denoncimin duke heshtur për këtë punë.
Çfarë lidhje keni ju me këto persona?
Natasha Përleka: Asnjë lloji lidhje, kurgjë, vetëm se njihemi se ai është shofer i furgonit ku më ka çuar tek puna ku kam punuar.”
Ku punoni?
Natasha Përleka: Në Shëngjin të Lezhës.
Keni shenja të tjera në trup?
Natasha Përleka: Kam edhe mbrapa shpinës, më dhemb edhe këtu përpara shumë.
Pas denoncimit në “STOP” të Natashës, stafi i emisionit iu drejtua policisë së kryeqytetit për të bërë denoncimin e saj.
Duam të bëjmë një denoncim, zonja.
Policja: Hajdeni.
Natasha Përleka: Unë kam pasur një ngatërresë para 3 vjetësh, i kam pas dhënë 500 mijë lekë shoferit të furgonit. Unë i kam dalë përpara atij për t’i kërkuar 500 mijë lekëshin, më ka goditur vetë me makinë edhe ka ardhur ambulanca më ka marrë, më ka çuar tek spitali edhe atje kanë bërë letrat, as nuk e kanë futur hiç brenda.
Policja: Po këtë herë çfarë ndodhi?
Natasha Përleka: Kurse këtë herë, pardje, kam shkuar unë se pas kësaj punës së besë kam shkuar për të folur tek shtëpia e atij për të folur me babain e tij. Kam qenë tek dera e portës, duke folur me gjyshin e atij djalit. Ka ardhur ky djali me makinë më ka marrë telefonin nga dora, e ka thyer dhe ka filluar të më godasë në shkelma në grushte, çfarë s’ka bërë.
Policja: Më dëgjo mua. Unë do të thërras një specialist të zyrës së ankesave dhe do të vijë t’ju dëgjojë.
Sapo dole nga Drejtoria e Përgjithshme e Policisë së Shtetit, çfarë të thanë aty, e bëre denoncimin?
Natasha Përleka: Po. Më thanë shko bëj kontrollet tek spitali, mund të shkosh tek policia e Lezhës, më dha numrin e telefonit dhe më tha do të më marrësh mua në telefon dhe do të fus që të takohesh direkt me të, unë i kam bërë letrat të gjitha gati për t’ja çuar drejtorit të përgjithshëm të shtetit.
Ti mbarove punë, bëre të gjithë denoncimin këtu?
Natasha Përleka: Po.
Rasti 2
Ruzhdi Dapi para mikrofonit të “STOP” denoncon dhunën e ushtruar ndaj babait të tij, sipas tij nga një person me probleme të shëndetit mendor.
Ka ndodhur një ngjarje e rëndë, është goditur babai juaj me sende të forta në fytyrë, si ka ndodhur dhe nga kush është goditur?
Ruzhdi Dapi: Kjo ndodhi para një jave, u godit nga komshiu që kemi pranë. Ne nuk kemi asnjë konflikt personal me të, kjo na shtyn të mendojmë se ky është me të meta mendore. Ka patur ankesa edhe nga banorë të tjerë të fshatit, mirëpo i vëllai e ka ndihmuar, ai e dëmton me këtë rast, duhet ta ndjekë me ilaçe me rrugët siç i ka shteti, mirëpo ai bën të kundërtën. Ne menduam se kishim të bënim me një me të meta mendore, por na doli gjithë familja budallenj. Shteti duhet ti ndjekë këto gjëra se po na tmerrohen fëmijët, nuk jemi të qetë në familjen tonë. Ne kërkojmë ta bëjmë publike këtë gjë që të parandalohen këto se nesër mund të na vrasë ndonjë fëmijë, kush do të përgjigjet?
Xhemal Dapi, denoncues: Ishte ora 12:30 i foli, i tha hajde këtu.
Kush?
Xhemal Dapi, denoncues: Ai që e vrau, Tan Velija. Ky shkoi, ai e priti me tub.
E goditi me tub hekuri?
Xhemal Dapi, denoncues: Po me tub hekuri, 3 metra e ca i gjatë./tvklan.al
