Mëngjesin e së enjtes, Partia Demokratike ka nisur zyrtarisht turin elektoral për zgjedhjen e kryetarit të ri ose konfirmimin e Lulzim Bashës edhe për katër vjet të tjera në krye të saj. Zgjedhjet vijnë pas një dështimi të madh në garën e 25 qershorit, ku demokratët morën një rezultat tejet negativ, madje të pakonceptuar prej tyre.
Basha, si kryetarë “i ngrirë” nga njëra anë dhe Eduard Selami, si kandidati për ti marrë fronin, nga krahu tjetër shpalosën pikat e para të platofrmës së tyre në rast se do i besohej drejtimi i PD. I pari foli për bashkim, i dyti për meritokraci
Basha e nisi fushatën e tij elektorale nga Kavaja, qytet që njihet si bastion i djathtë dhe që Berisha e ka pagëzuar si djepin e demokracisë Shqiptare. Po ashtu, fitorja e kandidatit të djathtë përballë atij të majtë në zgjedhjet lokale, ishte e vetmja pikë suksesi në dështimin e madh të Bashës drejtimin e PD-së, gjatë zgjedhjeve që u mbyllën një javë më parë. Dhe kjo padyshim është një pikë tjetër në favor të Kavajës si pikënisje e fushatës elektorale. Dhe, pikërisht fjalimi i kryetarit të PD, Lulzim Basha nisi nga fitorja e arritur në Kavajë.
“Kavaja është leksioni që duhet të shërbejë si mësim e frymëzim për të gjithë demokratët. Aty ku demokratët u bashkuan siç u bashkuan të gjithë nën drejtimin e Isa Sakes, të gjithë pa asnjë mungesë, pa asnjë përjashtim, pa asnjë zemërthyerje, kudo ku kjo ndodhi, bandat dhe milionat e drogës dhe të korrupsionit nuk bënë fajde. Arritën ta ndikonin, por jo ta përmbysnin rezultatin. Dhe, ky është mësimi dhe thirrja ime sot, jo si kandidat, por si demokrat. Bashkohuni demokratë kudo ku jeni, lini mënjanë qefmbetjet. Nuk është ora për të parë se çfarë kemi marrë nga Partia Demokratike, por njësoj si në vitin 1991 është ora për të parë çfarë mund të japim për Partinë Demokratike dhe për Shqipërinë dhe demokracinë”, deklaroi Lulzim Basha.
Pra Kryetari i PD-së, në platformën e tij për rikthimin e PD-së në pushtet; ka si pikënisje bashkimin.
Nga krahu tjetër, Eduard Selami vjen me një filozofi tjetër, atë të meritokracisë. Ai e nisi fushatën në zonën Lezhës dhe Laçit, ndërsa nënvizoi se meritokracia do të jetë kryefjalë e punës së tij si kryetarë i PD-së.
Ai është shprehur se “platforma e tij do të rikthejë meritokracinë brenda Partisë Demokratike. “Nga kjo garë Partia Demokratike do të dalë shumë më e fortë”, ka thënë Eduard Selami përpara anëtarëve në Lezhë dhe Laç.
Gjithashtu ai ka theksuar nevojën që të kërkohen arsyet e problemeve pse Partia Demokratike është duke kaluar një nga krizat më të mëdha. Ai tha se edhe pse kjo është një garë e pa barabartë, nuk është false.
