Pas dy muajsh pauzë, kanë rinisur operacionet e dërgimit të emigrantëve të shpëtuar në Mesdhe në qendrat e azilit në Shqipëri. Kështu shkruan Ansa, e cila përmes një artikulli bën me dije se emigrantët do të transferohen me anijen italiane “Cassiopea”, e cila aktualisht ndodhet pranë ishullit Lampedusa dhe është gati për t’u nisur drejt vendit tonë.
Kujtojmë se më herët, dy raste të sjelljes së emigrantëve në qendrat e Shëngjinit dhe Gjadrit u kundërshtuan nga gjyqtarët italianë, të cilët e referuan rastin në Gjykatën Evropiane të Drejtësisë. Gjykata e Romës mori vendimin kundër qëndrimit të emigrantëve të kapur në det nga Italia, në kampet e ngritura në Shqipëri. Pas këtij vendimi, qeveria italiane nxori një dekret ligjor që rishikonte listën e vendeve të konsideruara të sigurta për riatdhesim.
Në fillim të këtij muaji, kryeministrja e Italisë Giorgia Meloni tha se marrëveshja me Shqipërinë do vijojë të zbatohet, duke e cilësuar “leksion për Europën”. Kjo marrëveshje me rëndësi u nënshkrua më 6 Nëntor të 2023-it, por deri më tani ka hasur “mjaft pengesa”.
Megjithatë, më 25 Shkurt pritet që Gjykata Evropiane e Drejtësisë të japë një vendim mbi përcaktimin e vendeve të sigurta./tvklan
