Ish-juristi i hipotekës në Durrës dhe dy persona të tjerë janë arrestuar ditën e sotme pasi nëpërmjet falsifikimit të dokumenteve i kanë marrë 5000 m² tokë një qytetari , duke e përvetësuar dhe regjistruar në hipotekë si të tyren.
Pas një hetimi disamujor, gjatë operacionit policor të koduar “Kthimi” u arrestuan Artur Isaku ish-jurist i hipotekës së Durrësit dhe qytetarët Faik Ibrahimi dhe Zyber Dema.
Ndaj tyre Gjykata e Rrethit Gjyqësor Durrës ka caktuar masën e sigurisë “Arrest në burg”.
Ata akuzohen për veprat penale “Shpërdorimi i detyrës” dhe “Falsifikimi i dokumenteve”, kryer në bashkëpunim.
“Specialistët për Hetimin e Krimeve Ekonomike dhe Financiare të Drejtorisë Vendore të Policisë Durrës, në vijim të punës për evidentimin dhe goditjen e veprimtarisë kriminale të falsifikimit të dokumenteve me qëllim përfitimin, bazuar dhe në inteligjencën informative, pas një hetimi disamujor me metoda proaktive, në bashkëpunim me Prokurorinë pranë Gjykatës së Rrethit Gjyqesor Durrës, finalizuan me sukses operacionin policor të koduar “Kthimi”. Në kuadër të këtij operacioni u bë e mundur kapja dhe ekzekutimi i masave të sigurisë “Arrest në burg” për shtetasit: A.I., 60 vjeç, ish-jurist i hipotekës së Durrësit; Z.D., 72 vjeç, dhe F.I., 68 vjeç, banues në Durrës.
Bazuar në provat e siguruara gjatë hetimit proaktiv, të kryer nga specialistët për Hetimin e Krimeve Ekonomike dhe Financiare, në bashkëpunim me Prokurorinë, Gjykata e Rrethit Gjyqësor Durrës, më datë 15.01.2023, ka caktuar për këta shtetas masat e sigurisë “Arrest në burg”, për veprat penale “Shpërdorimi i detyrës” dhe “Falsifikimi i dokumenteve”, kryer në bashkëpunim.
Këta shtetas, në bashkëpunim me njëri-tjetrin, duke përdorur dokumente të falsifikuara, i kanë marrë rreth 5000 m² tokë një shtetasi, të cilën e kanë përvetësuar dhe regjistruar në hipotekë si të tyren”-thuhet ndër të tjera në njoftimin e policisë.
