Të tjera detaje dalin në dritë në lidhje me krimin në Durrës, ku një 19-vjeçare vrau babain e saj pasi donte ta fejonte pa dëshirë.
Të afërmit e Pëllumb Metës kanë folur për gazetarët pranë banesës së familjes.
Krushku i familjes Meta, (kishte marrë vajzën e madhe të viktimës për djalin) tha se 19-vjeçarja nuk mund të vriste dot një pulë dhe jo më babain e saj.
“Ne e njohim për familje shumë të mirë. Nuk kemi pasur asnjë lloj dyshimi se çfarë konfliktesh kanë në shtëpi. Për zhdukjen ka rreth 2 javë që na kanë thënë, që nuk ka ardhur në shtëpi, ka humbur. U interesonim, pyesnim nëse është gjetur, absolutisht. Më vonë kemi marrë vesh që është gjetur makina tek Parku rinia. Sot na njoftuan që është gjetur.
Dëgjo nuk dua të futem në këto çështje, se këto janë çështje personale, familjare, ajo vajza nuk mbyt dot një pulë, jo njeri”, tregoi krushku i viktimës.
Ai tregon se Hygerta Meta ishte studente dhe sipas tij nuk të shkon mendja fare që ajo mund të bëjë këtë veprim.
“Më gjatë siç e ka pranuar ajo nuk di ç’të them, sepse ato janë çështje të brendshme. Vajza ka qenë shumë e mirë, studente, vajzë e respektuar. Nuk të shkon mendja fare që ajo ta bëjë këtë veprim”, tha ai.
