Të shtunën luhet një nga ndeshjet më të rëndësishme të Shqipërisë, kjo edhe për shkak të ngarkesës emocionale që mbart sfida kundër Serbisë.
Presidenti i Federatës Shqiptare të Futbollit, Armand Duka, në një intervistë për emisionin Opinion në Tv Klan, ka thënë se ka interesë të lartë për bileta nga tifozët.
Sipas Dukës, deri javën e kaluar numri i aplikimeve për bileta për ndeshjen Shqipëri-Serbi ka qenë të paktën 200 mijë kërkesa.
“Kërkesa të jashtëzakonshme. Marketingu para më shumë se 1 javë ka thënë që ka pasur 200 mijë aplikime. Nuk e di nëse ky është i fundit se mund të jenë dhe më shumë. Shpërndarja me short është i rastësishëm, sistemin nuk e përdorim vetëm ne, është ndërkombëtar, kështu e përdor UEFA dhe FIFA. Tifozëri serbe nuk do të ketë në stadium”.
Sa i përket pakënaqësive nga tifogrupet për mungesë biletash të dedikuara, Armand Duka theksoi se sistemi i ri për blerjen e biletave u jep mundësi të gjithëve.
“Nuk kemi pasur bileta të dedikuar për askënd, bileta të dedikuara ka patur vetëm për ato që federata ka marrëdhënie kontraktuale. Këtë e kemi konsideruar si politikë më të mirë për t’i dhënë shanse të barabarta të gjithëve.
Të gjithë duhet të kenë shanse të barabarta për të qenë në stadium. Kjo ka sjellë një lloj pakënaqësie, sepse në të shkuarën jo vetëm tifozëve kuqezi, por dhe grupimeve të tjera, u kemi dhënë bileta, tashmë kemi vendosur që si gjithë federatat e tjera të Europës t’i shpërndajmë në mënyrë të barabartë”.
Presidenti i FSHF-së ka edhe një mesazh për tifozët në ndeshjen Shqipëri-Serbi.
“Nga publiku presim të mbështesë skuadrën me entuziazëm dhe me Fair Play në shkallët e stadiumit. Uroj ta shijojnë atë ndeshje me rezultat pozitiv. Do të jetë një gjë shumë e keqe nëse humbim”.
Sfida Shqipëri-Serbi luhet më 7 Qershor në stadiumin “Air Albania” në Tiranë, në orën 20:45.
