Presidenti i Shteteve të Bashkuara, Donald Trump tha për mediat në Mar-a-Lago, Florida, se ishte ai që udhëzoi ushtrinë e Shteteve të Bashkuara për të kryer goditjen ajrore që vrau Qassem Soleimanin.
Trump shtoi se gjenerali iranian u vra për të ndalur luftën dhe se Shtetet e Bashkuara janë të gatshme dhe të përgatitura për çdo reagim të mundshëm. Ai shtoi gjithashtu se Soleimani po përgatiste sulme ndaj diplomatëve amerikanë dhe personelit ushtarak.
“Ajo çfarë Shtetet e Bashkuara bënë dje, duhej të ishte bërë prej shumë kohësh. Shumë jetë mund të ishin shpëtuar. Protestuesit që u shtypën brutalisht në Iran, ku mbi një mijë civilë të pafajshëm u torturuan dhe u vranë nga vetë qeveria e tyre. Ne vepruam për të ndalur një luftë. Nuk vepruam që të fillojmë luftën”, tha Trump pasi bëri një përmbledhje të asaj që ai e cilësoi si aktivitet terrorist të Qassem Soleimanit.
Ai nënvizoi se nëse amerikanët do të kërcënohen, Shtetet e Bashkuara janë të përgatitura për çdo skenar të mundshëm
“Nëse do të kërcënohen amerikanët, kudo që të ndodhen, ne i kemi të identifikuara objektivat dhe unë jam gati dhe i përgatitur për të ndërmarrë çdo veprim të mundshëm”, tha Presidenti Trump.
Pothuajse të njëjtën linjë, Trump mbaji dhe në postimin e tij në rrjete sociale ku shkroi se gjenerali ishte përgjegjës për vdekjen e miliona njerëzve, teksa shtoi se ai urrehej nga populli që në të njëjtën kohë i trembej atij.
“Gjenerali Qassem Soleimani ka vrarë dhe ka plagosur rëndë mijëra amerikanë dhe po planifikonte të vriste të tjerë, por u kap! Ai ishte përgjegjës direkt dhe indirekt për vdekjen e miliona njerëzve, përfshirë një numër të madh protestuesish të vrarë në Iran. Edhe pse Irani nuk do ta pranojë kurrë, Soleimani urrehej nga populli që në të njëjtën kohë i trembej atij. Iranianët nuk janë aq të dëshpëruar sa duan t’i tregojnë botës udhëheqësit e tyre. Duhej të ishte hequr qafe vite më parë”, shkruan ai. /Opinion.al
