Kryeministri Edi Rama ka reaguar sërish lidhur me debatet e fundit dhe kritikat mbi draftin e ri të Kodit Penal.
Përmes një postimi në rrjete sociale, Rama thekson se drafi i Kodit të Ri Penal u prezantua për të mbledhur në mënyrë demokratike dhe transparente opinionet rreth tij.
Ai tha se problem serioz nuk është liria në Shqipëri, por masa domethënëse e atyre që e përdorin lirinë vetëm për të bërë sherr e shamata për mungesën e saj.
“Të alarmuarit nga drafti i Kodit të ri Penal dhe gojëmbyllja me ligj e forcave liridashëse politike dhe mediatike, mbase duhet të kujdesen që të mos ekspozohen shumë në diell, ndërkohë që drafti i ekspertëve të nderuar të fushës është prezantuar publikisht pikërisht për të mbledhur në mënyrën më demokratike dhe transparente të mundshme të gjitha opinionet rreth tij.
Hëpërhë problem më serioz që ka liria në Shqipëri nuk është as regjimi, as drafti i kodit të ri jo e jo, po masa domethënëse e atyre që e përdorin lirinë vetëm për të bërë sherr e shamata për mungesën e saj”, shkruan Rama.
