Gjykata e Posaçme ka caktuar masën e sigurisë arrest shtëpie për Pajtime Fetahun të arrestuar për korrupsion.
Seanca është zhvilluar veçmas te tjerave, ndërsa mësohet se ish-gjyqtarja ka pretenduar se nuk ka dijeni për asnjë nga akuzat e prokurorisë.
Ndërkohë, seanca për ish-gjyqtaren e akuzuar për korrupsion u zhvillua e veçuar nga 11 personat e tjerë, për të cilët është ekzekutuar masa e sigurisë në kuadër të vijimit te operacionit plumbi i artë. Pas daljes nga seanca ish-gjyqtarja u shpreh se s’ka asgjë për të thënë. Ndaj ish gjyqtares rëndon akuza ‘Veprime korruptive në ndihmesë të këtij grupi kriminal’ .
Më 29 korrik 2024 GJKKO firmosi 33 masa sigurie, nga të cilat 13 janë ekzekutuar ndërsa, 2 rezultojnë të arrestuar më parë jashtë Shqipërisë. Po sot do të jepen masat e sigurisë dhe për 12 të tjerët.
Në njoftimin e bërë publik dje SPAK bënte me dije se vëllezërit Franc dhe Hajdar Çopja, me kalimin e viteve kishin arritur të fuqizoheshin ekonomikisht dhe si rrjedhojë dhe pozitat e tyre në raport me grupet e tjera në trafikun e drogës në Europë e jo vetëm.
Organizata e tyre ishte në qendër të operacionit të organizuar të mërkurën, 31 korrik, me 33 urdhëra arresti, nga të cilët u ekzekutuan 13 në Shqipëri, ndërsa dy të tjerë janë arrestuar më herët jashtë vendit. Pjesa tjetër rezuton të jenë larguar prej kohësh nga Shqipëria.
Organizata, thotë SPAK kishte arritur të rekrutonte edhe dy punonjës të policisë së shtetit dhe një punonjëse në gjykatën e Elbasanit që u jepte informacione sekrete.
Të paktën 4 atentate me 6 të vrarë, 3 vrasje të mbetura në tentativë, 14 të porositura, dhe grabitja e 4.6 milionë eurove në Rinas në prillin e vitit 2019 janë vetëm disa prej krimeve më të rënda të cilat SPAK ka zbardhur dhe thotë se kanë për autorë organizatën kriminale të vëllezërve Franc dhe Hajdar Çopja Elbasani.
Hetimet e Prokurorisë së Posaçme u çuan përpara falë bashkëpunimit me Eurojust, Europol dhe autoritetet holandeze, belge dhe franceze.
Prokuroria dje nuk bëri të ditur emrat e personave të arrestuar, por në ditën e operacionit u mësua se mes personave për të cilët ishin firmosur urdhërarrest ishte edhe ish gjyqtarja e Elbasanit Pajtime Fetahu, shefi i krimeve në Durrës Agustin Cinari si dhe nëndrejtori i Burgut të Bradasheshit Martin Musaj. Urdhëra arresti ka patur dhe për dy punonjës të tjerë policie, ndërkohë që rezulton e përfshirë dhe një punonjëse e administratës gjyqësore të Gjykatës së Elbasanit.
