Ish-anëtari i Gjykatës Kushtetuese, Besnik Ymeraj, i cili dha dorëheqjen në janar të këtij viti, është referuar në Prokurori për ndjekje penale nga Komisioni i Pavarur i Kualifikimit.
Mësohet se ky Komision ka referuar pranë zyrës së Prokurorisë së Përgjithshme dokumentacionin për ish-gjykatësin Ymeraj.
“Komisioni i Pavarur i Kualifikimit njofton se, në bazë të nenit 281 të Kodit të Procedurës Penale, ka referuar pranë Zyrës së Prokurores së Përgjithshme të gjithë dokumentacionin që rezultoi nga hetimi administrativ gjatë procesit të rivlerësimit të ish-gjyqtarit të Gjykatës Kushtetuese, zotit Besnik Imeraj” bën me dije Komisioni i Pavarur i Kualifikimit.
Ish-gjyqtari Besnik Imeraj i pyetur nga TV Ora News tha se padia penale ndaj tij është sulm politik.
“Padia penale është politike, nuk ka asnjë bazë kushtetuese dhe ligjore. Që kur Edi Rama dhe Qeveria po bëjnë kontrollin e gjyqtarëve gjithcka është e qartë. Unë nuk kam asnjë problem me ligjin”
Burime të Prokurorisë së Përgjithshme nuk kanë dhënë detaje në lidhje me kallëzimin e bërë nga KPK ndaj ish anëtarit të Gjykatës Kushtetuese, por thanë se materialet do të përcillen për hetim në prokurorinë kopetente, në rast se bëhet fjalë për korrupsion hetimi kryhet nga Krimet e rënda. Ndërsa në rast se padia është për ceshtjen e deklarimit të pasurisë, hetimi kryhet nga Prokuroria e Tiranës.
Besnik Imeraj prej prillit 2013 ishte anëtar i Gjykatës Kushtetuese dhe ligjërisht mandati i tij mbaronte në prill 2022, por ai ka vendosur të dorëhiqet 4 vite para mbarimit të mandatit në këtë gjykatë.
Të njëjtën procedurë ndoqi edhe ish-prokurori i përgjithshëm Adriatik Llalla, për të cilin KPK ndërpreu vetingun, por nuk ka njoftuar nëse ja ka dërguar materialin Prokurorisë së Përgjithshme.
Të mërkurën pritet që KPK të nisë seancën e parë dëgjimore me anëtarin e Gjykatës Kushtetuese Fatos Lulo.
