Gjykata e Lartë ka vendosur që “21 Janari” t’i kalojë SPAK dhe të hetojë këtë dosje. Vendimi i Gjykatës së Lartë është detyrues për Prokurorinë e Posaçme, duke pranuar në këtë mënyrë kërkesën e familjarëve të viktimave që “21 Janari” të hetohet nga SPAK.
Për këtë vendim ka reaguar kryeministri Edi Rama nëpërmjet një postimi në rrjetet sociale. Në postimin e tij, Rama vlerëson vendimin e Gjykatës së Lartë, duke thënë se kthyer në jetë shpresën për drejtësi.
Duke theksuar kontributin për drejtësinë e re, Rama thotë se tashmë që kjo çështje do të jetë në dorën e SPAK do të dënohen personat përgjegjës.
Edhe pse ishte personi që organizoi protestën e dhunshme të 21 janarit të vitit 2011, kreu i qeverisë shkruan se i mirëkupton dhe personat që e kanë kritikuar për vonesën e drejtësisë.
“Vendimi i Gjykatës së Lartë sot për kthimin në jetë të dosjes së përgjakur të 21 janarit, ka kthyer në jetë shpresën e varrosur në mendjen e shumë shqiptarëve, se ajo dosje e një krimi të egër shtetëror do të dilte më nga varri i drejtësisë së kalbur shqiptare! Ky vendim i ka rihapur rrugën e mbyllur kaq shumë vite, syrit së drejtësisë mbi vendin dhe autorët e atij krimi, duke e kthyer vendimin e qartë të Gjykatës Europiane të të drejtave të Njeriut në një mundësi konkrete për drejtësinë e re, që të bëjë histori me vendosjen e një drejtësie të drejtë. Sot jam më krenar se asnjëherë deri më tash për kontributin unik që Partia Socialiste dha në shembjen e Pallatit të Vjetër të Drejtësisë përmes Reformës në Drejtësi; për durimin në ballafaqimin e vështirë me mllefin legjitim të shumë të zhgënjyerve nga zvarritja e pafundme deri në varrosje e kësaj çështjeje; për moslëkundjen e bindjes se drejtësinë për 21 janarin mund, duhet e do ta bëjë vetëm drejtësia dhe askush tjetër, sado që ajo të vonojë. Me frymëmarrjen e lehtësuar nga vendimi i sotëm dhe vetëdijen se rruga drejt shpagimit përfundimtar nga drejtësia e gjakut të pafajshëm të katër dëshmorëve të 21 janarit është ende e përpjetë, dua t’u them të gjithë atyre që në këto vite të gjata nuk i kanë kursyer fjalët e hidhura në drejtimin tim e të PS: Keni të gjithë mirëkuptimin tim, po kurrë mos e humbni besimin tek forca jonë e përbashkët dhe Shqipëria që po bëjmë me përpjekjen tonë të përbashkët”,-shkruan Rama./Opinion.al
