TIRANE- “Udhëheqësit politikë po e përdorin debatin për arsye politike. U kërkoj atyre që të bien dakord sepse Byroja e Hetimit është institucion jetik për anti-korrupsion. Një institucion i mbështetur nga FBI amerikane”. Kështu është shprehur ambasadori amerikan Donald Lu, duke folur edhe një herë shqip dhe qartë.
Pjesë nga deklarata e Donald LU
“Në opinionin përfundimtar të Komisionit të Venecias thuhet se mirëpret funksionet antikorrupsion të BKH-së që do të vendoset nga një prokuror i posaçëm i pavarur, pra as nga Prokurori i Përgjithshëm dhe as nga Policia e Shtetit Shqiptar. Hetuesit e BKH-së do të përbëhen nga policë gjyqësor. Drejtori i saj për anti-korrupsionin do të jetë një oficer i policisë gjyqësore i cili do t’i raportojë një prokurori të posaçëm të pavarur. Ky prokuror do të japë llogari përpara popullit shqiptar .
Udhëheqësit politikë po përpiqen ta përdorin debatin për BKH-në për arsye politike. Të gjithë ata bien dakort se korrupsioni dhe ndikimet politike pengojnë bërjen e drejtësisë në Shqipëri. U kërkoj atyre në të djathtë dhe në të majtë që të bien dakort se BKH është një institucion jetik për anti-korrupsionin në Shqipëri.
Më lejoni ta përfundoj me një citim nga filmi “Të paprekshmit”. Njëri prej policëve elitarë i luajtuar nga aktori i famshëm Sean Connery e pyet prokurorin që është Kreu i “Të Paprekshmëve”: Ju më thatë se doni të kapni Capone-n, a doni ta kapni atë me të vërtetë? A e kuptoni se ajo që po them është, çfarë jeni të përgatitur të bëni?” dhe prokurori i përgjigjet: “Gjithçka brenda ligjit”.
