Kuvendi i Shqipërisë i ka dërguar SPAK vendimin e marrë në seancën e sotme parlamentare për dhënien e autorizimit për ashpërsimin e masës së sigurisë ndaj ish-kryeministrit Berisha.
Kuvendi ka dërguar vendimin në Prokurorinë e Posaçme kundër Krimit të Organizuar dhe Korrupsionit rreth dy orë pasi kërkesa e SPAK për heqjen e imunitetit të Berishës u miratua me 75 vota pro.
Në dokumentin e dërguar në SPAK nga kryeparlamentarja Lindita Nikolla thuhet:
“Bashkëlidhur ju dërgojmë: Vendim nr. 127/2023 “Për kërkesën e Prokurorisë së Posaçme kundër Korrupsionit dhe Krimit të Organizuar, Tiranë, për dhënien e autorizimit për arrestimin/heqjen e lirisë së deputetit Sali Berisha, nëpërmjet zëvendësimit të masës së sigurimit”.
Gjithashtu, bashkëlidhur ju dërgojmë edhe raportin rekomandues të deputetëve të shumicës parlamentare, anëtarë të Këshillit për Rregulloren, Mandatet dhe Imunitetin, dhe raportin rekomandues të deputetit Enkelejd Alibeaj, anëtar i Këshillit për Rregulloren, Mandatet dhe Imunitetin”.
