Pas nënstacionit të Librazhdit, zbulohet një tender tjetër i fituar nga kompania e Edmond Begos, biznesmenit me 5 emra, që është dënuar në Itali me 21 vite burg. Ai ka miqësi me Taulant Ballën, dhe këtë e ka pranuar vetë funksionari i lartë i PS-së.
Partia Demokratike nuk ndalet së denoncuari! Sot ka publikuar të tjera dokumente që faktojnë se kompania e Begos ka përfituar nga fondet publike. Bëhet fjalë për rrugën Tiranë-Ebasan, ku kompania ka përfituar si nënkontraktore plot 10 milionë euro.
Më poshtë deklarata e plotë e Gent Strazimirit nga selia e PD-së
Tre vjet më parë, si në këtë kohë, i shtrenguar nga presioni ndërkombëtar, Edi Rama u detyrua të nxjerrë një nga një kriminelet e tij nga parlamenti. Por kjo ishte vetëm fasada, sepse bashkëqeverisja e Edi Ramës me krimin mbetet e pacënuar dhe Shqipëria parajsë e krimit të organizuar.
Kjo qeveri ka vënë buxhetin e shtetit në shërbim të trafikantëve të drogës, të vrasësve, të dënuarve për përdhunim dhe trafik vajzash e fëmijësh.
Dokumenti që Partia Demokratike publikoi dje për tenderin 1 miliardë lekë që miku trafikant droge i Taulant Ballës fitoi në Librazhd dy muaj më parë, është vetëm një nga shumë dokumentat zyrtarë që provojnë sesi taksat e shqiptarëve shkojnë për pasurimin e një grushti kriminelësh të lidhur me pushtetin.
Taulant Balla hesht, për të fshehur atë që e mendojnë të gjithë, se është ky personi i pushtetshëm që i ka siguruar trafikantit të drogës akses në paratë dhe pasuritë e shqiptarëve dhe se ky akses në miliona euro është burimi i miqësisë familjare që Taulant Balla ka me ish-anëtarin e bandës së Lushnjës, që dikur luante futboll me kokat e prera.
1 miliardë lekët e dy muajve më parë për nënstacionin e Librazhdit janë shumë pak në krahasim më paratë e siguruara 3 vitet e fundit, jo nëpërmjet tenderave publikë, por si nënkontraktues i firmave private, që detyrohen nga i pushtetshmi i Partisë Socialiste t’i kalojnë paratë kompanisë së trafikantit të drogës.
Rasti më flagrant është ai i ndërtimit të autostradës së Elbasanit.
Partia Demokratike ka vërtetuar se kompania “Inerte Express” e trafikantit të drogës dhe mikut të familjes së Taulant Ballës ka përfituar 10 milionë euro që nga viti 2015 deri më sot nga paratë e taksapaguesve shqiptarë.
Është kjo një nga arsyet pse gjendja për njerëzit e zakonshëm është përkeqësuar dhe mesatarisht 45 biznese mbyllen në ditë, që kur Edi Rama vendosi thundrën në ekonominë shqiptare.
Ti dyqanxhi, biznesmen shqiptar apo i huaj, që psherëtin në kafe dhe thua që leku “është mçef”, kupto që leku nuk është fshehur! Ai shkon në xhepat e trafikantëve të drogës, biznesi i të cilëve shumëfishohet brenda ditës nën kujdesin e veçantë të Edi Ramës dhe taulantëve të tij.
