Kryeministri i vendit, Edi Rama është dakord me qytetarët që i shkruajnë në rubrikën “Sy m’Sy”, të cilët i thonë se duhet bërë për shumë për pensionistët. Gjatë fjalës së tij, Rama shprehet se bonuset për pensionistët do të jenë pjesë e rrugëtimit të tyre teksa shton se do të rindërtohet një skemë në funksion të rritjes së pensioneve.
Edi Rama: Jam shumë dakord dhe do të bëjmë patjetër më shumë për pensionet. Bonueset do të jenë pjesë e rrugëtimit tonë. Koncepti i pjesëmarrjes së pensionistëve nga të ardhurat nga rritja ekonomike do të stabilizohet gjatë mandatit të katërt. Unë jam besimplotë se me 2 bonuse dhe pastaj me një rindërtim të skemës në funksion të rritjes së pensioneve, Shqipëria 2030 do të jetë një vend ku pensionistët do të ndihen shumë të përfshirë në tryezën e rishpërndarjes së të ardhurave nga ekonomia.
Më tej, Kryeministri Rama ka ritheksuar se bonusi i pranverës për pensionistët do të lëvrohet nga data 1 Mars teksa thotë se ata bëjnë atë që thonë.
Edi Rama: Vendimin e qeverisë për dhënien e bonusit për pensionistët që lëvrohet duke nisur nga data 1 Mars. Sipas premtimit, bonusi është 62 milionë Euro. Nuk janë pak për buxhetin e Republikës. Për ata që marrin deri në 200 Euro do të jetë 100 Euro bonus. Për ata që marrin më shumë se 200 Euro, bonusi do të jetë 50 Euro. Nga 1 Marsi në vijim, pensionistët do të tërheqin bonusin e pranverës. Ne themi atë që bëjmë dhe bëjmë atë që themi.
