Bashkëpunëtori i drejtësisë Nuredin Dumani ka treguar në Gjykatën e Posaçme detaje të krimeve të tij ndër vite për llogari të grupeve kriminale. Një prej tyre është dhe plani i vrasjes së Fatmira Dedaj, në vitin 2013.
“E morëm vesh itinerarin e gjithë ditës së viktimës. E vëzhgonim me segmente kohore. Dinim kohën kur shkonte tek karburanti, kur shkonte tek varrezat dhe kur shkonte tek një spital tek Currilat. Shumë herë e kam ndjekur edhe unë vetë. Vëzhgimi niste jashtë lagjes. Edhe Talo e ka vëzhguar. Ajo shkonte në varreza rreth orës 7 të mëngjesit gjithmonë”.
Para togave të zeza tregoi se si ndryshuan planin për të mos e vrarë në varreza.
“Unë tek varrezat nuk e mora përsipër ta bëja, se duhet të ecnim shumë në këmbë. Aty pastaj vendosëm ta bëjmë vrasjen tek garazhi. Me Talon diskutuam si të mos duket shumë e rëndë. U vendos që vrasja të kryhej te garazhi, në mënyrë që të dukej si një grabitje dhe të ishte më e lehtë për ne”.
Fatmira Dedaj ishte nëna e Elvis Dedaj, i cili u vra një vit para saj po në qytetin e Durrësit, i përfshirë në trafikun e drogës.
Seanca gjyqësore është shoqëruar me debate mes të pandehurve. Njërit prej tyre Dumani iu drejtua se “do jua ha unë hallvën të gjithëve këtu dhe jo ju mua”. Por atij iu përgjigj Enver Diva nga kafazi, i cili i tha se do ta shohim kush do i hajë hallvën njëri-tjetrit. Nuredin Dumani për disa seanca me radhë po përballet me ish-shokët e tij dhe avokatët e tyre. Në drejtimin e togave të zeza, ai u përgjigjet pyetjeve të tyre.
Klan News
