Kreu i Partisë Demokratike, Lulzim Basha, ka refuzuar t’i përgjigjet drejtpërdrejt pyetjes, në rast se humb zgjedhjet për pushtetin vendor, a do japë dorëheqjen si kryetar i partisë më të madhe opozitare në vend.
Basha i ftuar në mbrëmje në një intervistë në emisionin “Studio e Hapur” të gazetares Eni Vasili në “News24”, theksoi se synim i vetëm mbetet fitorja e PD-së.
Ndërsa, në lidhje me mbledhjen e Këshillit Kombëtar të PD-së, ai tha se mosmbledhja e Këshillit Kombëtar është vazhdimi i një tradite që duhet të ndërprehet në fakt, për arsyen se anëtarët e Këshillit janë të gjithë kryetarët e grupeve.
Sipas tij, edhe pse Këshilli nuk është mbledhur, kuorumi është marrë. Kreu i PD-së, deklaroi se ndryshimet në statut nuk kanë si synim largimin e kryetarit, por fitoren e zgjedhjeve.
“Kryetarët nuk mbahen me zor në krye të partisë”, tha Basha.
Më tej, kreu i PD-së tha se demokratëve në garën e korrikut u ka premtuar që PD të dalë nga ky proces, sa i përket vendimmarrjes brenda saj, me një vendimmarrje demokratike.
Ai tregoi se një vendim i marrë nga një trupë më e madhe gabon më shumë se një vendim i marrë në trupë më të vogël.
“Ato që ne besojmë do bëhen realitet dhe do e nisim ndryshimin brenda vetes”, tha Basha.
