Me një mungesë të theksuar etike, dje kryeministri Edi Rama i quajti “qorrë” të gjithë ata që kritikojnë projektin e stadiumit të ri, aty ku ndodhet sot “Qemal Stafa”.
Sot Rama ka shkuar edhe më tej.
Edhe pse kësaj here nuk e ka përmendur fjalën dembelë (gjë të cilën e ka bërë shumë herë të tjera), në kuadër të Panairit të sivjetshëm të Punës që po zhvillohet në Tiranë, ndër ato që tha në rreshta, Z. Rama e nënkuptoi qartazi një gjë të tillë.
“Kush kërkon punë, le ta shfrytëzojë Panairin e Punës ku 130 kompani shqiptare kërkojnë 8000 punonjës të të gjitha kategorive; nga punë me pagë modeste në manifakturë tek punë me rrogë 3.000 Euro në IT; nga zanatçinj të nivelit fillestar tek inxhinierë dhe ekonomistë të lartë; nga shërbimet tek industritë prodhuese e përpunuese. E lehtë të ankohesh nga kafeneja që s’ka punë dhe ta presësh punën që të ta japë shteti; më e vështirë, por absolutisht e vetmja rrugë, që ta kërkosh e ta gjesh punën në sektorin privat! Në panairin e vjetshëm u realizuan mbi 800 kontrata punësimi. Në këtë panair mundësia është për shumë më shumë. Ky panair është një mundësi reale për punësim real. Përpara se sa të bëni komente mohuese, shkoni dhe prekeni vetë të gjithë gamën e mundësive të ofruara nga kompanitë pjesëmarrëse në Panairin e Punës 2016”, – qe komenti i tij.
Nuk kuptohet përse kryeministri shpalos një mllef të lartë dhe një mungesë të vazhdueshme etike, në dy raste, ku sipas tij gjërat janë shumë mirë.
Pra, edhe projekti i stadiumit është i shkëlqyer, edhe vende pune ka.
E vërteta e hidhur me sa duket është krejt tjetër.
Kryeministri e ka prekur edhe vetë disa herë, por në formë justifikimi dhe jo zgjidhjeje, kur ka thënë se punë ka, por jo krahë të kualifikuar punë për vendet vakante.
Në fakt ajo që duhet të bënte një kryeministër dhe një ekzekutiv, nuk është konstatimi, por zgjidhja.
Tre vjet qeverisje, janë mëse të mjaftueshme për të kualifikuar mijëra të rinj për vendet vakante të punës, ku nuk ka krah të kualifikuar, gjë për të cilën qeveria na paska qenë në dijeni.
Problemin e ka kapur në thelb edhe gazetari i Top Channel Klodian Tomorri.
Ai shkruan plot sarkazëm në profilin e tij në Facebook: “Katastrofe kushtetuese. Vendi rrezikon te hyje ne krize te paprecedente kushtetuese dhe te mbese pa qeveri. Rroga e kryeministrit ne Shqiperi eshte dicka rreth 1500-1700 euro ne muaj. Ajo e ministrave rreth 1200 euro. Me keto vende pune qe po hapen me rroga dy dhe tre here me te larta do na ike gjithe qeveria. Rame viktima te suksesit tone. Kush do e qeverise Shqiperine tani?”./Mapo
