Në një kohë që Vladimir Gjuta gjendet në paraburgim si i dyshuar për “dhunë në familje” në dëm të të atit dhe thyerje të masës së sigurisë, Gjykata e Tiranës ka pushuar padinë e babait të tij për lëshim urdhri mbrojtjeje.
Ka qenë vetë babai i Gjutës, Ferit Gjuta, ai që ka pohuar para gjykatës se nuk është dhunuar dhe se nuk ka kërkuar mbrojtje nga i biri. Nga ana tjetër, Gjykata ka pasur në dosje materialin e përcjellë nga Policia, ku kërkesa për mbrojtje ishte nënshkruar nga 78-vjeçari.
Vendimi për pushimin e gjykimit të kësaj kërkese është shpallur në seancën e 22 qershorit, të kryesuar nga gjyqtarja Irena Hoxha. Sipas vendimit, pushimi i padisë është argumentuar me faktin se paditësi heq dorë nga gjykimi i padisë.
“Nga shqyrtimi gjyqësor në këtë fazë gjykimi në seancën e lëshimit të urdhrit të menjëhershëm të mbrojtjes, rezultoi se: Paditësi ka paraqitur kërkesë-padinë për lëshimin e urdhrit të menjëhershëm të mbrojtjes kundër djalit të tij, i cili në këtë gjykim ka cilësinë e të paditurit. Në seancën gjyqësore të çelur për këtë gjykim, paditësi, në fazën e kërkesave paraprake pretendoi që ai nuk ka kërkuar që në emër të tij të përpilohet kërkesë-padi për mbrojtje ligjore”, thuhej në vendimin e Gjykatës.
Në vijim, Gjykata theksonte se në kushtet kur kërkesë-padia është e nënshkruar nga Ferit Gjuta, ai, në cilësinë e paditësit, hoqi dorë nga gjykimi i kësaj çështjeje dhe kërkoi pushimin e gjykimit të saj me pretendimin se i padituri nuk ka ushtruar dhunë ndaj tij.
I padituri Vladimir Gjuta nuk është paraqitur në këtë seancë. Pretendimi se Vladimir Gjuta kishte konsumuar dhunë në familje u mohua kategorikisht nga familjarët e tij, pas arrestimit të tij më 20 mars.
Në momentin e arrestimit, Gjuta ishte në një gëzim familjar në Kamzë, ndërkohë që duhet të ishte në banesën e tij në Tiranë për llogari të një mase sigurie “arrest shtëpie” dhënë më herët ndaj tij.
Babai i Gjutës, Ferit Gjuta, tha publikisht se nuk kishte kallëzuar djalin e tij për dhunë, por kishte firmosur disa letra që i kishin dhënë në polici, pa ditur se çfarë ishin.
“Vetëm kur erdha në shtëpi, më thanë djemtë që unë kisha firmosur që më kishte bërtitur djali. Unë nuk kam kërkuar urdhër mbrojtjeje”, tha Ferit Gjuta, pasi Gjykata e Tiranës la në qeli djalin e tij.
Vladimir Gjuta është personi që u hetua për një vit nga Prokuroria për Krimet e Rënda si organizatori i sulmeve me tritol ndaj familjarëve të ministrit të Brendshëm, Saimir Tahiri, akuzë që nuk u provua./Panorama
