Ministri i jashtëm i Venezuelës, Jorge Arreaza tha se Shtetet e Bashkuara po përpiqeshin padrejtësisht të rrëzonin qeverinë e Nikolas Maduro. Ndaj ai sugjeroi bisedime mes Maduros dhe Donald Trump, për të gjetur mbase një bazë të përbashkët.
“Ka një përpjekje nga fuqitë e jashtme për të rrëzuar një qeveri të zgjedhur dhe kjo shkon kundër të gjitha rregullave të së drejtës ndërkombëtare”, shtoi Arreaza.
Por vetëm pak orë pas kërkesës së tij për dialog, administrata e presidentit Trump, ka refuzuar prerazi bisedimet me qeverinë e Maduros.
Nënpresidenti i SHBA-ve, Mike Pence përjashtoi perspektivat e bisedimeve.
“E vetmja gjë për të diskutuar me Maduro në këtë pike, është koha dhe data e largimit të tij. Për t’u kthyer demokracia dhe për të rindërtuar Venezuelën, Maduro duhet të largohet sa më shpejt”, tha Pence në Twitter, duke shuar menjëherë idenë e dialogut.
Dhjetra diplomatë, kryesisht nga vendet e Amerikës Latine, e bojkotuan fjalimin e Arreazës duke u larguar nga salla. Kujtojmë se Shtetet e Bashkuara dhe dhjetëra vende të tjera kanë njohur udhëheqësin e opozitës Juan Guaido si presidenti legjitim i Venezuelës, Por Maduro ende kontrollon institucionet ushtarake, shtetërore dhe disa nga kompanitë më të mëdha të vendit./E.M
