Gjykata e Tiranës vendosi masën e sigurisë arrest në burg për Robert Kullën, djali i Nehat Kullës, ky i fundit i njohur si “Gjenerali”.
Robert Kulla u denoncua nga njerka për dhunë në familje.
Në seancën e sotme për masën e sigurisë, Robert Kulla ka pretenduar se nuk ka ushtruar dhunë, por konflikti me gruan e babait të tij është një konflikt civil, që lidhet me pronësin e banesës, ku të dy pretendojnë pronësi pas vdekjes së Nehat Kullës.
Robert Kulla e kërkon si trashëgimtar dhe njerka si bashkëshorte e të ndjerit.
Nehat Kulla, i njohur me nofkën “Gjenerali”, ka qenë kreu i një bande kriminale në vitin 1997, që vepronte në periferi të Tiranës, kryesisht në Tufinë. Gjatë vitit 1997, ai arriti të krijojë një komisariat të mirëfilltë policie, me aktivitet në zonën e Kinostudios dhe Tufinës në Tiranë.
Nehat Kulla ndërroi jetë në moshën 67-vjeçare në Qershor të 2020-ës si pasojë e disa sëmundjeve.
