Dhoma Amerikane e Tregtisë ngriti dje shqetësimin e pasaktësive nga Bashkia e Tiranës në llogaritjen e taksës së pastrimit, taksës së tabelës dhe taksën e re të arsimit. Kryetari i komitetit të taksave dhe ligjeve në Dhomën Amerikane, Artan Bozo, i kërkoi Bashkisë që për taksën e pastrimit të aplikohen tarifa të ndryshme, sipas llojit të aktivitetit që biznesi kryen.
“Ne kërkojmë të nisim një dialog me Bashkinë e Tiranës për tarifat e pastrimit, ku kërkojmë që ato të përcaktohen në bazë të aktivitetit. Ka një mospërputhje në kategorizimin që i bëhet biznesit nga ana e Bashkisë dhe nga kategorizimi që i bëhet biznesit nga Tatimet. Për këtë të përdoret kategorizimi i bizneseve sipas aktivitetit ekonomik që ato kryejnë, sipas kategorizimit që përdorin tatimet, në mënyrë që biznese të caktuara të paguajnë atë tarifë që u takon, por në mënyrë të drejtë”, u shpreh Bozo. Nga Dhoma Amerikane u ngrit si shqetësim edhe taksa e arsimit, e cila po paguhet disa herë nga biznesi.
“Tarifa për infrastrukturën arsimore po paguhet nga çdo NIPT sekondar. Pra i njëjti subjekt, pavarësisht se sa njësi ka, duhet të paguajë po aq herë për të njëjtën tarifë”, u shpreh Bozo. Nënkryetari i Bashkisë, Arbër Mazniku, pohoi se Bashkia e Tiranës ka treguar rigorozitet në mbledhjen e të ardhurave, si dhe shprehu gatishmërinë për ngritjen e dialogut për çdo ndryshim taksash.
Mazniku informoi edhe mbi masat lehtësuese që Bashkia do të ndërmarrë për bizneset e reja. “Për disa nga shqetësimet që ju ngritët, jemi duke marrë masa. Për bizneset e reja në mbledhjen e ardhshme të Këshillit Bashkiak kemi një vendim që shtyn pagesën e taksave të bizneseve të reja nga 30 ditë, që është aktualisht në 90 ditë, në mënyrë që bizneset e reja të kenë më shumë kohë për të paguar taksat dhe tarifat lokale”, u shpreh Mazniku.
Ndërsa tabela informuese për vendndodhjen e biznesit, sipas Dhomës Amerikane, po tarifohet si taksë reklame. Këtij shqetësimi, Mazniku iu përgjigj duke saktësuar se paketa fiskale nuk tarifon vetëm tabelat deri në 2 metra katrorë, qoftë informuese, në rast se përdoren për qëllim reklamimi.
ANKESAT E BIZNESIT
Tarifa për infrastrukturën arsimore po paguhet nga çdo NIPT sekondar. I njëjti subjekt tregtar, pavarësisht se sa njësi ka, duhet të paguajë po aq herë për të njëjtën
tarifë.
Tabelat që informojnë vendndodhjen e një subjekti të mos interpretohen nga inspektorët bashkiakë si tabela reklamuese dhe të mos faturohen si tabela për reklamë.
Subjektet apo shoqëritë tregtare që janë në likuidim e sipër, në faliment, apo që janë me status pasiv dhe nuk zhvillojnë aktivitet tregtar, të mos paguajnë taksat vendore.
Të thjeshtohen procedurat e paraqitjes së dokumenteve në regjistrimin e biznesit të ri, statuti i themelimit dhe regjistrimi në QKR-së të kontrollohen online nga Bashkia.
Të thjeshtohen dokumentet që duhen paraqitur në momentin e depozitimit të një kërkese dhe ankese.
