Merr fund arratia e Klodi Lesit në Greqi, kapet 18 ditë pasi vrau bashkëshorten
Pas 18 ditësh arrati policia greke ka mundur të arrestojë shqiptarin Klodi Lesi, 35 –vjeçarin nga Rubiku që vrau bashkëshorten e tij greke, me të cilën kishte dy fëmijë.
Ai u kap në këtë magazinë pranë fshatin Ormilia, në Kalkidiki, jo larg shtëpisë ku natën e 6 janarit vrau gruan.
Me vete kishte edhe djalin 4 –vjeçar, Febon, që e mori nga shtëpia menjëherë pas krimit. Fëmija është në gjëndje të mirë shëndetësore dhe pa asnjë lëndim.
Policia e rrethoi Lesin pasi kishte marrë një telefonatë nga një e moshuar 75 – vjeçare që e sinjalizoi për praninë e tij. Sapo pa forcat e shumta të rendit, ai u tha atyre “Dorezohem” dhe nuk foli asnjë fjalë më shumë.
Policia thotë se ai kishte tentuar disa herë të shkonte në Selanik, por ishte kthyer pas për shkak të postblloqeve të shumta.
Klodi Lesi e qëlloi gruan e tij 7 herë me thikë, në sy të djalit të madh të çiftit, vetëm 6 – vjeç, pas konflikteve të vazhdueshme që ai kishte me të, që prej nisjes së procesit të divorcit.
