Deputeti i Partisë Socialiste, Pjerin Ndreu është përfshirë në një aksident rrugor në Fushë Arrës paraditen e të shtunës, teksa po udhëtonte me mjetin e tij tip “Land Rover” me targë 176 KJ.
“Panorama” ka mësuar se në vendin e quajtur “Hadroj”, deputeti Ndreu është përplasur me një furgon mallrash me targë AA 168 CI, me shofer shtetasin me inicialet D.C.
Deputeti Ndreu u përfshi në pjesën më të madhe të qendrave të votimit për procesin e referendumit të PS në rrethin e Pukës duke qenë se ishte përcaktuar që të mbikqyrte atë zonë në votimin për referendumin.
Në përpjekje për të parë të gjitha qendrat e votimit, burime nga policia e Pukës, thanë për “Panorama” se deputeti Ndreu ka tejkaluar shpejtësinë e lejuar duke shkelur kështu rregullat e qarkullimit rrugor.
Mësohet se në drejtimin e mjetit ka qenë vetë Ndreu, kur është përplasur me furgonin.
Nga aksidenti i shkaktuar në rrugët e Pukës një grua që ndodhej në furgon ka marrë disa dëmtime në trup dhe me shpejtësi është dërguar në spitalin rajonal për të marrë ndihmën e shpejtë mjekësore.
“Panorama” mësoi se e aksidentuara ndodhet jashtë rrezikut për jetën edhe pse ka pësuar disa dëme fizike.
Në momentin e përplasjes furgoni i mallrave po shkonte nga Puka në Fushë Arrës ndërsa deputeti Ndreu në sensin tjetër nga Fushë Arrësi në Pukë.
Në vendin e ngjarjes menjëherë kanë mbërritur forcat e policisë për të bërë hetimet e plota mbi këtë aksident të ndodhur. Policia e Shkodrës e ka raportuar ngjarjen duke thënë se nga aksidenti ka vetëm dëme materiale.
