Pasi zëvendëskryetarja e Kuvendit, Valentina Leskaj lexoi: “Betohem, se do t’i bindem Kushtetutës dhe ligjeve të vendit, do të respektoj të drejtat dhe liritë e shtetasve, do të mbroj pavarësinë e Republikës së Shqipërisë dhe do t’i shërbej interesit të përgjithshëm dhe përparimit të Popullit Shqiptar”, Ilir Meta vendos dorën mbi Kushtetutë dhe shqipton “Betohem, duke u bërë zyrtarisht Presidenti i dhjetë i historisë së shtetit shqiptar.
Në seancën e mbledhur këtë të hënë, të pranishëm ishin deputetë të të gjitha grupeve parlamentare, përfaqësues të trupit diplomatik të akredituar në Shqipëri, drejtuesit e komuniteteve fetare, drejtuesit e institucioneve të pavarura, etj.
Pas betimit, Ilir Meta mbajti fjalimin e parë si President, duke thënë se Shqipëria dhe Demokracia do jenë gjithë të parat duke i shërbyer konsensusit. Presidenti Meta tha se sot me ndjenjën e mirënjohjes për ju dhe për të gjithë shqiptarët të cilët presin më shumë nga ne dua tju siguroj se për Presidentin e ri Shqipëria dhe Demokracia do jenë gjithënjë të parat.
“Dua tju siguroj se në ushtrimin e kësaj përgjegjësie kaq të lartë që Kuvendi i Shqipërisë më ka besuar do të udhëhiqem vetëm nga dashuria e pakufijshme për Shqipërinë dhe gjithë shqiptarët, duke lënë pas bashkë me 25 vitet e mia në këtë Kuvend çdo debat apo përkatësi politike që kam patur për t’iu përgjigjur lartësisë së re të detyrës së Presidentit të Republikës”.
Më tej, Meta theksoi se do angazhohet për miratimin me konsensus të plotë të ndryshimeve kushtetuese për reformën në drejtësi e cila është vendimtare për të ardhmen tonë europiane.
“Sot angazhohem edhe si President për të mbështetur zbatimin e drejtë dhe transparent të kësaj reforme në interes të zbatimit të shtetit të së drejtës, të luftës kundër korrupsionit dhe krimit të organizuar dhe përmirësismit të klimës së biznesit, aq e domosdoshme për të rritur ekonominë tonë më tej dhe sidomos për të krijuar vende pune për të mirëpaguar të rinjtë tanë”, tha ai.
Pas përfundimit të ceremonisë së betimit në Parlamentin e Shqipërisë, Presidenti i ri i Republikës, Ilir Meta u nis për në Presidencë ku u takua me Presidentin në ikje të Shqipërisë, Bujar Nishani.
Ndërkohë, dhjetra të ftuar, mes të cilëve edhe kryeministri Rama, kryeopozitari Basha, ministra, deputetë, ambasadorë, liderë fetarë, ish-Presidentë, etj, zunë vend në tribunat e ngritura në Oborrin e Presidencës.
Pas dëgjimit të himnit dhe të 21 të shtënave të topit, kryetari i Gjykatës Kushtetuese, Bashkim Dedja i dorëzoi Kushtetutën Presidentit të Republikës, Ilir Meta i cili tha se “përvoja politike më inkurajon të them sot se gjithnjë ia ka vlejtur për të gjetur dhe eksploruar se çfarë na bashkon si dhe për të bërë lëshimet dhe kompromiset e domosdoshme për hir të mbarësisë kombëtare. Dua t’ju afirmoj serish se jam besnik i palëkundur i dialogut dhe konsensusit si gjuha e vetme e suksesshme e politikës, si filozofi që ndërton mirëkuptim, bashkim mes qytetarëve dhe mirëqenie. Demokracia është jetike për një vend si yni, të cilit i rëndon një e shkuar totalitare 50-vjeçare, ku liritë dhe të drejtat themelore të njerëzve u asgjësuan në emër të popullit.”
Më tej, Presidenti i Ri i Republikës u përshëndet me ish-Presidentin Nishani dhe bashkëshorten e tij, të cilët pas pesë vitesh në Presidencë u larguan sipas protokollit të shtetit, ndërsa Meta pasi bëri foton zyrtare me dy vajzat dhe djalin, u përshëndet me krerët e shtetit, ministrat, deputetët, kryetarët e partive, liderët fetarë, ambasadorët dhe miqtë e të ftuarit.
