Janë heronj. Pavarësisht se po kthehen në atdhe, ndërkohë që Europiani nuk ka mbaruar ende, lojtarët e Kombëtares do të priten me ceremoni shtetërore dhe si heronj. Festë në shesh, rrugë të rezervuara vetëm për parakalimin e kuqezinjve, si dhe takime me zyrtarë të lartë shtetërorë. Kjo është axhenda që pritet të ndjekë Kombëtarja gjatë ditës së sotme.
Nisja Do të jetë një pritje e gjatë. Nisja e avionit çarter të Kombëtares do të bëhet rreth orës 14:00, në mesditën e sotme. E mbrëmshmja ka qenë nata e fundit e Shqipërisë në Europian dhe për lojtarët i fundit 24 orësh në grumbullim me Kombëtaren për këtë aventurë historike.
Pas barazimit të Portugalisë, Shqipëria është eliminuar përfundimisht dhe që nga ai moment kuqezinjtë kanë pësuar ulje të humorit dhe janë trishtuar që nuk u ka mjaftuar ajo fitore ndaj Rumanisë për të vijuar aventurën në Europian edhe pas fazës së grupeve. Udhëtimi Është parashikuar që të zgjasë tri orë. Nga nisja në Francë deri në mbërritjen në aeroportin e Rinasit mendohet që do të jenë tri orë udhëtim për kuqezinjtë. Pas mbërritjes në tokën e tyre, lojtarët kuqezi do të nisin më pas edhe “turin” e takimeve zyrtare që do t’u paraprijnë edhe festës së madhe në shesh.
Takimet Ministria e Jashtme pritet që të jetë destinacioni i parë i Kombëtares. Kreu i këtij institucioni do të presë delegacionin kuqezi ku do të dhurohen pasaportat diplomatike që janë premtuar për lojtarët dhe stafin e kombëtares kuqezi. Më pas, Kryeministria do të jetë destinacioni në vijim të udhëtimit të Kombëtares.
Kreu i Qeverisë do ta presë Kombëtaren për të bërë falënderimet zyrtare, përpos atyre që Rama ua ka përçuar me anë të telefonatës që pati me delegacionin kuqezi pas fitores me Rumaninë, ku edhe u akordua një shpërblim prej 1 milion eurosh. Festa Heronjtë pritet që të festojnë me popullin e tyre. Në “fan zonën”, në sheshin “Nën Tereza”, pritet që të ketë një ceremoni festive ku Kombëtarja do të ketë mundësinë që të jetë përballë tifozëve të saj në një tjetër festë që do të përmbyllë aventurën kuqezi në Europian.
AXHENDA
Ne 15.30 ekipi kombëtar vjen ne aeroport (Rinas)
1 Pritja ne aeroport (ceremoni mirëseardhjeje)
2 Nisja nga aeroporti drejt Tiranës. Me kamera shoqërohet autobusi i kombëtares
3 Ceremonia e dhënies se çelësit ne Bashkinë e Tiranës,
4 Ministria e Jashtme, procedurat për pasaporta diplomatike.
5 Kryeministri, pritja ne COD
6 Fan Zone (stacioni i fundit i ceremonialit për Kombëtaren)
