Një ngjarje e rëndë ndodhi mbrëmjen e së premtes në Fier, ku Xhuliano Miho vrau me thikë 23-vjeçarin Xhimi Bakaj, bashkëjetuesin e ish-bashkëshortes së tij.
Mësohet se sherri ka ndodhur për ish-gruan dhe se autori dhe viktima janë ndeshur rastësisht në rrugë dhe pas një debati të çastit ish-burri i saj ka goditur me thikë bashkëjetuesin 23-vjeçarë të gruas.
Ngjarja ndodhi në lagjen “11 Janari” rreth orës 21:00 të mbrëmjes së të premtes.
Pas goditjeve me thikë Xhimi Bakaj nuk ka mundur t’i mbijetojë dot plagëve të marra pavarësisht se iu nënshtrua një ndërhyrjeje kirurgjikale. Për pasojë ai ndërroi jetë në spital.
Ai është goditur tre herë më thikë në pjesë të ndryshme të trupit. Më pas, policia e ka arrestuar 39-vjeçarin Miho teksa patrullonte në zonë. Ai ka pranuar menjëherë autorësinë e këtij krimi.
“Ka pohuar se është nxituar pasi është fyer rëndë nga viktima dhe më pas e ka goditur atë me thikë”, raporton Klan News.
Por pavarësisht kësaj policia mendon se ishte vrasje me paramendim pasi ai ishte i armatosur me thikë me vete.
Miho kishte dy fëmijë me gruan 33 vjeçe. Ata ishin ndarë zyrtarisht prej 9 muajsh pasi ajo ishte njohur me 23-vjeçarin Bakaj.
