Një ngjarje e rëndë u regjistrua sot në pyllin e Tërnovës. Policia tha se u njoftua se është plagosur me armë gjahu (çifte), shtetasi Vasil Kamberi, 36 vjeç, i cili si pasojë e plagëve të marra, ka humbur jetën gjatë transportimit me helikopter për në spital.
Menjëherë policia ka bërë edhe shoqërimin e 34-vjeçarit, i cili po merret në pyetje.
Paraprakisht bëhet e ditur se 34-vjeçari i identifikuar si Flamur Kamberi, ka vrarë me çifte kushëririn e tij Vasil Kamberi, teksa ndodheshin në pyll për gjueti (dyshohet si ngjarje aksidentale, por dinamika është ende nën investigim policor).
Policia vendore e konfirmoi ngjarjen e ndodhur rreth orës 12:00, në pyllin e fshatit Tërnovë e Vogël në Bulqizë. Vasil Kamberi më herët ka mbajtur emrin Deli, por e ka ndërruar në Vasil.
“U njoftuam se është plagosur me armë gjahu (çifte), shtetasi V.K., 36 vjeç, (Vasil Kamberi) i cili si pasojë e plagëve të marra, ka humbur jetën gjatë transportimit me helikopter për në spital”, njoftoi policia.
