Kreu i Kuvendit, Ilir Meta ka mbajtur një konferencë për mediat në Kryesinë e Kuvendit pas takimit gati dyorësh me kreun e PD-së, Lulzim Basha në hotel “Rogner”.
Takimi erdhi pas dështimit të negociatave mes mazhorancës dhe opozitës për miratimin e draftit të reformës në drejtësi.
“I kërkova falje z. Basha për gabimin teknik të futjes në kalendarin e Kuvendit të reformës në drejtësi. Ndryshimet kushtetuese do të futen vetëm sipas ligjit dhe rregullores në kalendarin e Kuvendit”, tha Meta.
Mirëpo, për takimin e sotëm mes kreut të Kuvendit të Shqipërisë, Ilir Meta dhe kreut të opozitës, Lulzim Basha ka qenë në dijeni edhe kryeministri i Shqipërisë Edi Rama.
Sa i përket dështimit të negociatave mes Bashës dhe Ramës, ku mësohet se ndarja qëndron në modelin me vende të rezervuara të këshillave të gjykatave dhe prokurorëve, Meta u duk sikur mbajti anën e opozitës.
Ai tha se drafti duhet miratuar sipas rekomandimeve të “Venecias”. “Në ato raste kur Komisioni i Venecias nuk është eksplicit për çështje të caktuara, atëherë duhet të marrim për bazë rekomandimet e Opdat dhe Euralius”, tha Meta.
