Polumbarët e Forcave RENEA kanë provuar në disa tentativa, që të vendosin jastekë ajri për të ngritur në sipërfaqe të Liqenit të Shkodrës, helikopterin EC 145, që u rrëzua tre ditë më parë. Orvatjet e tyre nuk kanë sjellë rezultat. Sipërfaqa e butë e rërës në fundin e liqenit ka bërë që me peshën e rëndë mjeti të zhytet dhe të jetë e pamundur të lidhen jastëkët e ajrit.
Misioni që sot ka dështuar, bën edhe më të domosdoshme praninë e ekspertëve të kompanisë prodhuese, si dhe angazhimin e mjeteve të tjera për nxjerrjen e helikopterit, qoftë të një helikopteri tjetër apo të një vinçi, pasi vetë helikopteri i zhytur peshin afërsisht 1 ton e 800 kilogramë.
Mbeten ende të paqarta rrethanat e këtij aksidenti.
Pasi ka nisur hetim për ngjarjen, Prokuroria e Përgjithshme është tërhequr nga hetimet duke ia lënë këtë çështje hetuesëve ushtarakë. Gjithashtu edhe për nxjerrjen e mjetit pritet që të vihen në dispozicion mjetet e Ushtrisë.
Prej dy ditësh mjeti që u rrëzua duke i marrë jetën Pilotit Florian Deliaj dhe Togerit Donald Hoxha, ruhet nga një motoskaf i policisë kufitare. Në brigjet e liqenit janë vendosur foca të policisë së rendit dhe Policisë Ushtarake të cilët nuk lejojnë civilët të afrohen.
Tragjedia me dy viktima dhe një të plagosur ndodhi mesditën e së mërkurës. Helikopteri me tre pensona në bord, ishte në një mision stërvitor në Veri të vendit.
Tv Klan
