Një grua 35 vjeçe ka vdekur në maternitet në muajin e nëntë të shtatzanisë. Ngjarja e rëndë ndodhi rreth orës 05:00 të mëngjesit të sotëm.
35 vjeçarja, Aida Koçi me banim në Paskuqan ka shfaqur komplikacione dhe është drejtuar në maternitetin “Koço Glozheni” në Tiranë mbrëmjen e djeshme. Siç dëshmojnë familjarët, kanë pritur përreth 20 minuta tek urgjenca e maternitetit.
Më pas është vizituar nga dy mjekë (emrat nuk dihen ende) të cilët i kanë adresuar familjarët të shkojnë në QSUT sepse sipas tyre, pacientja ka probleme me zemrën. Më tej, 35 vjeçarja i është nënshtruar analizave tek pavioni i kardiologjisë, por nuk ka rezultuar të ketë probleme kardiake. Më tej, mjekët e QSUT e kanë dërguar pacienten me ambulancë tek Sanatoriumi me dyshimet se kishte probleme të mushkërive.
Por as atje nuk është vënë re asnjë problem. Pacientja është kthyer në maternitet rreth orës 02:00 të mëngjesit në gjendje tejet të rënduar. Xhaxhai i saj, rrëfen se pasi janë sorollatur me orë të tëra nëpër spitale, kur janë kthyer në maternitet sërish nuk i kanë gjetur mjekët e urgjencës në gadishmëri.
Futja e saj në sallën e operacionit ka vonuar dhe familjarët as në këto momente nuk i dinë shkaqet e verteta të vdekjes së foshnjës në barkun e nënës dhe më pas edhe të vetë nënës, që ka lënë pas dy fëmijë të tjerë jetim.
Vëllai i viktimës thotë se është shoqëruar në polici, sepse ka thyer një xham në gjendje të tensionuar, por nuk është shoqëruar asnjë mjek për të dhënë dëshmi për të këtë ngjarje tejet të rëndë.
Familjarët kërkojnë drejtësi. Ata thonë se e afërmja e tyre vdiq vetëm për shkak të neglizhencës dhe padijes së mjekëve të maternitetit “Koço Glozheni”.
*Në foto 1 vëllai i gruas që vdiq në maternitet; Foto 2: Kunati i saj që e ka shoqëruar nga shtëpia në spital
