Fëmijët e mitur të çiftit Dervishi, Keidoni 4 vjeç dhe Klea 8-muajshe, ndoshta për shkak të moshës nuk e kanë kuptuar se çfarë ka ndodhur.
Por të bërtiturat e më pas krismat i kanë terrorizuar duke bërë që për disa orë të mos pushojnë së qari. Pasi u vrau nënën, i ati i çoi te fqinja e katit të tretë dhe vetë u largua.
Por djali, që kishte kuptuar diçka nga ajo që kishte ndodhur, i ka treguar gruas ku e la i ati, se babai i tij kishte qëlluar me pistoletë.
“Mami me babin u zunë. Më pas babi…”, ka treguar me gjeste e zë zhurmën që bën pistoleta kur shkrepet. Kaq ka mjaftuar që ajo të kuptojë se çfarë kishte ndodhur.
Gruaja ka treguar për Policinë se fëmijët, kryesisht djali 4-vjeçar, kanë qenë mjaft të trembur dhe gjatë gjithë kohës kanë qarë. Ajo nuk ka mundur që t’i pajtojë për gati një orë.
Më pas, familjarët e çiftit kanë shkuar dhe i kanë marrë fëmijët. Viktima, Ida Dervishi, prej disa ditësh kishte marrë me qira një dyqan në pallatin ku banonte dhe shiste rroba të përdorura.
Vajzën ajo e mbante gjithmonë me vete, ndërsa djalin e dërgonte në kopsht. Tashmë që nëna e tyre nuk jeton më dhe babai i tyre është arrestuar, nuk dihet se kush do të marrë kujdestarinë e fëmijëve./Panorama
